FILISXEEME Isiraeele qassara galagalte daggu. Sasu bayiruuddu Daawiti roduuwi Saaooli wottaaddara ikkite no. Konni daafira Isseyi mitto barra Daawiti togo yee soyi: ‘Roduuwikkira gidenna tima haadhe haˈri; noo garano lai.’

Daawiti wottaaddaru noowa iilliti, roduuwasi laˈˈara olu base dodi. Hakkiinnino Filisxeemete jigeessi Goliyaadi Isiraeele qacifatara dayi. Goliyaadi 40 barra soodono hawarrono togo qacifatanni keeshshino. Togo yee booˈni: ‘Ane ledo qasamannoha mitto mancho doorre. Hakku manchi qeelieronna shiiero, ninke borojjeˈne ikkineemmo. Ani qeelummosironna shuumosiro kayinni, kiˈne borojjenke ikkitinanni. Ledoˈya qasamanno mancho uyitinannie gede hasiˈreemmo.’

Daawiti wottaaddaru giddonni mitoota, ‘Konne Filisxeemete mancho shee, Isiraeele konni saalinni fushshannohura ma uyinanni?’ yee xaˈmi.

Mittu wottaaddarchi, ‘Saaooli lowo woxe aannosi. Qoleno ilino beettosi galte ikkitasira aannosi’ yee qoli.

Goliyaadi jigeessa ikkino daafira, Isiraeele baalanti lowo geeshsha waajjitino. Goliyaadi hojja 6 cigile (3 meetire) saˈˈanno; qoleno wonqosi duhannohu wolu wottaaddari noosi.

Wottaaddaru giddonni mitootu marte Saaoolira Daawiti Goliyaadi ledo qasama hasiˈranno yite kultusi. Saaooli kayinni Daawiti, ‘Konni Filisxeemete manchi ledo qasama didandaatto. Ati qaaqqoho; isi kayinni anjesinni hanafe wottaaddaraho’ yiisi. Daawitino togo yee qoli: ‘Anniˈya gereewo ittara dagginore dibinna doobbiichcho shoommo. Konne Filisxeemete manchono insa gede asseemmo. Yihowa kaaˈlannoe.’ Konni daafira Saaooli, ‘Harixa, Yihowa ledokki ikkona’ yiisi.

Hakkiinnino Daawiti laga dirre onte qunqumadda kinna haare ogorisira wodhi. Hakkunni gedensaanni, corqayesi adhe jigeessu manchi ledo qasamara haˈri. Goliyaadi iso laiti, xagge assiri. Daawiti shaa hakkeeshsha diqarrissanno yee hedino.

Goliyaadino, ‘Hanni shiqqi yii; maalakki ceatenna moyichchoho eemmona’ yiisi. Daawiti kayinni, ‘Ati anewa bise, qalacconna urde adhite dawootto; ani kayinni Yihowa suˈminni dawoommohe. Techcho barra Yihowa ate angaˈyara sayise aanno; anino goowakki gorreemmo’ yii.

Hakkiinnino Daawiti Goliyaadiwa hige dodi. Ogorisinni kincho haare corqayesira wore, wolqasi geeshsha oli. Kinchu Goliyaadi sammo gane kareenna reyi! Filisxeemete daga worbinsa reyinota affuti, baalunku xooqqu. Isiraeeleno insa shorritanni hadhe, ola qeeltu.