BAFILISITIA ba tla go lwantsha Baiseraele gape. Ka nako eo bomogoloe Dafide ba bararo ba mo mophatong wa masole a ga Saulo. Ka jalo letsatsi lengwe Jese o raya Dafide a re: ‘Isetsa bomogoloo mabele le senkgwe. Ba botse gore ba ntse ba tsoga jang.’

Fa Dafide a goroga kwa bothibelelong, o tabogela kwa masole a leng teng go ya go batla bomogolowe. Seganka sa Mofilisitia se se bidiwang Goliathe se tla go sotla ka Baiseraele. O ntse a dira seno moso mongwe le mongwe le maitseboa ka malatsi a le 40. O goa a re: ‘Tlhophang mongwe wa banna ba lona a tle go lwa le nna. Fa a ka fenya mme a mpolaya, re tla nna batlhanka ba lona. Mme fa nka fenya ka mmolaya, lo tla nna batlhanka ba rona. Ke lo gwetlha gore lo tlhophe mongwe a tle go lwa le nna.’

Dafide o botsa masole mangwe jaana: ‘Monna yo o bolayang Mofilisitia yono a bo a dira gore a se ka a tlhola a kgoba Baiseraele, o tla newa eng?’

Lesole lengwe le mo raya le re: ‘Saulo o tla naya monna yoo dikhumo di le dintsi. Gape o tla mo naya morwadie gore e nne mosadi wa gagwe.’

Le fa go ntse jalo, Baiseraele botlhe ba tshaba Goliathe ka gonne e le seganka. O boleele jwa dimetara di ka nna 3, mme o na le lesole le lengwe le le mo tshwaretseng thebe.

Masole mangwe a ya go bolelela Kgosi Saulo gore Dafide o batla go lwa le Goliathe. Le fa go ntse jalo, Saulo o raya Dafide a re: ‘Ga o ka ke wa kgona go lwa le Mofilisitia yono. O mosimanyana fela, mme ene ga a bolo go nna lesole botshelo jotlhe jwa gagwe.’ Dafide o araba jaana: ‘Ke bolaile bera le tau tse di neng di batla go bolaya dinku tsa ga rre. Mme Mofilisitia yono o tla nna jaaka nngwe ya tsone. Jehofa o tla nthusa.’ Ka jalo Saulo o mo raya a re: ‘Tsamaya, mme e kete Jehofa a ka nna le wena.’

Dafide o fologela kwa molapong a bo a batla maje a le matlhano a a borethe, mme o a tsenya mo kgetsaneng ya gagwe. Go tswa foo o tsaya motsekedi a bo a ya go kgatlhantsha seganka. Fa Goliathe a mmona, ga a dumele se a se bonang. O akanya gore o tlile go bolaya Dafide motlhofo fela.

Goliathe o mo raya a re: ‘Tla kwa go nna mme ke tla naya dinonyane le diphologolo mmele wa gago gore di o je.’ Mme Dafide o mo raya a re: ‘O tla kwa go nna ka tšhaka, ka lerumo le ka lerumo le le konopiwang, mme nna ke tla kwa go wena ka leina la ga Jehofa. Gompieno Jehofa o tla go tsenya mo seatleng sa me mme ke tla go bolaya.’

Gone fela foo Dafide o tabogela kwa go Goliathe. O ntsha leje mo kgetsaneng ya gagwe, o le tsenya mo motsekeding a bo a le konopa ka maatla a gagwe otlhe. Leje le ya ka tlhamalalo kwa go Goliathe le mo itaya mo phatleng, mme o wela fa fatshe o a swa! Fa Bafilisitia ba bona gore seganka sa bone se ole, botlhe ba a retologa ba a tshaba. Baiseraele ba a ba lelekisa mme ba fenya ntwa.