AN MGA Pilisteohanon nakig-away na liwat ha Israel. Mga sundalo na ni Saul an tulo nga magurang ni David. Salit usa ka adlaw, ginsugo ni Jesse hi David: ‘Dad-i hin trigo ngan tinapay an imo kabugtoan. Kitaa an ira kahimtang.’

Han inabot hi David ha kampo han kasundalohan, kinadto dayon hiya ha lugar nga arawayan basi makita an iya kabugtoan. Ginawas an Pilisteohanon nga higante nga hi Goliat basi himoon nga pataraw-an an mga Israelita. Ginbubuhat niya ini kada aga ngan gab-i ha sulod hin 40 ka adlaw na. Nagsisinggit hiya: ‘Pagpili hin usa ha iyo kasundalohan nga makikig-away ha akon. Kon magdaog hiya ngan mapatay niya ako, magigin uripon niyo kami. Kondi kon ako an magdaog ngan mapatay ko hiya, magigin uripon namon kamo. Pili kamo hin usa nga maato ha akon.’

Nagpakiana hi David ha pipira nga kasundalohan: ‘Ano an makakarawat han tawo nga makakapatay hini nga Pilisteohanon ngan makakawara hini nga pakaalo ha Israel?’

‘Tatagan hiya ni Saul hin damu nga bahandi. Ngan ihahatag niya an iya anak mismo basi magin asawa hito nga tawo,’ siring han sundalo.

Kondi an ngatanan nga Israelita nahahadlok kan Goliat tungod kay daku hiya hinduro. Sobra 9 ka piye (mga 3 metros) an iya kahitaas, ngan may-ada hiya sundalo nga paradara han iya taming.

Ginsumatan han pipira nga sundalo hi Hadi Saul nga karuyag ni David nga makig-away kan Goliat. Kondi nagsiring hi Saul kan David: ‘Diri ka puydi makig-away hini nga Pilisteohanon. Bata ka pa, samtang hiya sundalo na tikang pa ha kabata.’ Hi David binaton: ‘Ginpatay ko an oso ngan leon nga nagkuha han karnero ni Tatay. Ngan mapapariho hito ini nga Pilisteohanon. Bubuligan ako ni Jehova.’ Salit hi Saul nagsiring: ‘Kadto, ngan hinaot hi Jehova umupod ha imo.’

Linugsong hi David ha sapa ngan kinuha hin lima nga maghamis nga bato, ngan iginbutang ito ha iya surudlan. Katapos, gindara niya an iya labyog ngan gintapo an higante. Diri makatoo hi Goliat han nakita niya hi David. Naghunahuna hiya nga masayon gud la patayon hi David.

‘Kadi ha akon, ngan ipapakaon ko an imo unod ha mga tamsi ngan hayop,’ siring ni Goliat. Kondi hi David binaton: ‘Kinanhi ka ha akon nga may dara nga espada, bangkaw ngan dyabelin, kondi kinanhi ako ha ngaran ni Jehova. Hini nga adlaw itutubyan ka ni Jehova ha akon kamot ngan papatayon ko ikaw.’

Dida hito dinalagan hi David ngadto kan Goliat. Kinuha hiya hin bato ha iya surudlan, iginbutang ito ha iya labyog, ngan iginlabyog ito hin makusog gud. Naigo an ulo ni Goliat, ngan namatay hiya! Han nakita han mga Pilisteohanon nga natumba an ira kampeon, nanmalagiw hira. Ginlanat hira ngan nagdaog an mga Israelita.