Tantara 58

Davida Ndreky Goliata

FILISTINY aby io navy hiady tamin’Israely. Zôkin’i Davida telo lahy iziô maramilan’i Saoly. Ke andra araiky Jese nan̈iraka Davida: ‘Mindao an̈atera vary, ndreky môfo rahalahinao aby io. Zahava karakôry nanin-drô an̈y.’

Davida koa fa navy tamy tobin’ny maramila tan̈y, izy nilomoay nisefaka tamy laharan̈an-drô maramila aby io, hitady ry rahalahiny. Goliata, Filistiny befatiarin̈y, navy nitokiky Israelita aby io. Zen̈y fo nataony isan’andra, tan̈atin’ny 40 andra. Izy nandronton̈o nivolan̈a: ‘Fidiana olo araiky aminarô hiady zaho. Izikoa izy mahafaty zaho, zahay ataova andevonarô. Fa izikoa zaho mahafaty izy, anarô ataonay andevo. Alifasa atỳ lelahy araiky hiady aminakahy.’

Davida nan̈ontany maramila sasany. Volan̈iny: ‘Ino hamian̈a olo mahafaty Filistiny io, beky Israely tsy men̈atra?’

Maramila araiky nivolan̈a: ‘Saoly han̈amia olo io harian̈a, baka iô koa zanany man̈angy hataony vady.’

Israelita jiaby navozo Goliata, fôtony izy befatiarin̈y be. Kadiriny telo metara halavasany, baka iô koa maramilanany araiky mitaondra raha fikalen̈a bala, beky tsy avoa izy.

Maramila sasany nandeha nivolan̈a tamin’ampanjaka Saoly fa Davida pare hiady Goliata. Kanefa Saoly nivolan̈a tamy Davida: ‘Anao tsy masaky Filistiny io. Tsaiky hely karaha ataonao io hiady amy maramila efa zatra miady.’ Davida nivolan̈a: ‘Ndray orsy ndreky lion andeha hihina ôndrikôndrikin’ny babako fo natiko, intsaka eky Filistiny io. Hataoko miran̈a biby aby in̈y izy. Jehovah han̈ampy zaho.’ Saoly nivolan̈a: ‘Alô edy. Irarian̈a Jehovah tsy hiala anao.’

Davida amy zay nandeha tamy ten̈arano, nitsimpin̈y vato malamatra dimy, baka iô nataony tan̈aty sakanany. Izy baka tiô nangala pilotro, lôso nan̈aton̈o Goliata. Goliata koa fa nahita izy, nitokiky. Tan̈atin’ny jerinany, tsisy dikany aminany mamono Davida.

Goliata nivolan̈a: ‘Man̈ataon̈a zaho, fa fatinao hamiako vôron̈o ndreky biby aby io.’ Davida nivolan̈a: ‘Anao man̈aton̈o zaho amy saboa ndreky mesobe, fa zaho man̈aton̈o anao amin’an̈aran’i Jehovah. Niany Jehovah handavo anao amy tan̈anakahy.’ 

Davida amy zay nilomoay nan̈aton̈o Goliata. Izy nangala vato araiky tamy sakanany tao, nataony tamy pilotronany, baka iô raha io naendriny mare be. Vato in̈y amy zay tafiditry tamy laharan’i Goliata! Izy baka tiô lavo in̈y, naty. Filistiny aby io koa fa nahita sefon-drô lavo, irô jiaby nilefa. Israelita aby io amy zay nan̈ian̈a irô, ke irô nandresy.

1 Samoela 17:1-54.