AFILISITI akwisasoni kukuputana ngondo ni Ayisalayeli. Acakulugwe ŵatatu ŵa Daudi sambano ali mu likuga lya asilikali ŵa Sauli. M’yoyo Jese akumsalila Daudi kuti: ‘Mwajigalile acakulu ŵenu tiligu ni mkate. Soni mjawule mkalole naga yindu yikwajendela cenene.’

Daudi pakukopocela ku malo ga asilikali gala, jwalakwe akuwutucila kwakuputila ngondo kukwasosasosa acakulugwe ŵala. Goliyati jwali Mfilisiti jwamacili akwima nikwatendaga cipongwe Ayisalayeli. Aŵele ali mkutenda yeleyi kundaŵi kulikose, soni ligulo lililyose kwa masiku 40. Jwalakwe akugumila kuti: ‘Asagule mundu jumo mwa jemanja kuti aputane ni une. Naga jwalakwe akupunda, soni akumbulaga une, tuciŵa acikapolo ŵawo. Nambo naga ngupunda une ni kum’wulaga jwalakwejo, nikuti jemanja cimciŵa acikapolo ŵetu. Kweleko kwangali jwampaka aputane ni une.’

Daudi akwawusya asilikali ŵane kuti: ‘Ana mundu jucacim’wulaga mfilisitiju nikwakulupusya Ayisalayeli ku cipongweci cacipegwa cici?’

Msilikali jwine akumsalila Daudi kuti: ‘Sauli cacimpa mundujo yipanje yejinji. Soni cacimpa mwanagwe jwamkongwe kuti aŵe ŵamkwakwe.’

Nambo Ayisalayeli wosope akumjogopa Goliyati ligongo jwalakwe ali jwamkulungwa mnope. Ali jwamlewu ciŵandika mamitala gatatu, soni akwete msilikali jwakumnyakulila cakulicinjilicisya cakwe.

Asilikali ŵane akwawula kukumsalila Mwenye Sauli kuti Daudi akusaka kuputana ni Goliyati. Nambo Sauli akumsalila Daudi kuti: ‘Mmwe ngaŵa mkuputana ni Mfilisitiju. Mmweji mli mcanda, nambo jwalakwejo aŵele ali msilikali kwa umi wakwe wosope.’ Daudi akwanga kuti: ‘Nawuleje cimbalangondo ni lisimba yayakamwile ngondolo sya baba ŵangu. Sambano Mfilisitiju caciwa mpela yinyama yeleyi. Yehofa cacingamucisya.’ M’yoyo Sauli akuti: ‘Jawulani, soni Yehofa aŵe namwe.’

Daudi akwawula mungulugulu mwa lusulo nikulokota maganga msano gakusalala nikugaŵika mu msaku wakwe. Kaneko akujigala lukonji lwakwe lwakuponyela maganga nikwawula kukusimana ni mundu jwamacili mnope jula. Goliyati pakum’wona Daudi, ngakukulupilila. Jwalakwe akuganisya kuti ngayimlema kum’wulaga Daudi.

Goliyati akuŵeceta kuti: ‘Gambani kwika kwa une, cimbelece cilu cenu kwa yijuni ni yinyama kuti yiŵe cakulya cakwe.’ Nambo Daudi akuŵeceta kuti: ‘Mkuyika kwa une ni upanga, nambo une nguyika kwa mmwejo ni lina lya Yehofa. Lelo jino Yehofa cam’pelece mmwejo kwa une, soni cinam’wulaje.’

Ndaŵi jijojo Daudi akuwutucila kwa Goliyati. Jwalakwe akujigala liganga mumsaku wakwe, nikuŵika mu lukonji lwakwe lwakuponyela maganga lula, kaneko akuponya ni macili gakwe gosope. Liganga lila likujakuputa nikwinjila pawusyo pa Goliyati, kaneko akugwa nikuwila papopo! Afilisiti paŵayiweni kuti mlongola jwawo amgomece, wosope ŵatandite kutila. Ayisalayeli ŵawutwisye Afilisitiŵa, soni ŵapundile ngondojo.