BENƐ David gbe Goliat se ɔ, Israel tatsɛ Abner ngɔ lɛ kɛ ba Saul ngɔ. Saul bua jɔ David he saminya. Nɛ e ngɔ David kɛ to e tabuli ɔmɛ a nya asafoatsɛ, nɛ e ha nɛ e hi matsɛ we ɔ mi.

Pee se benɛ tabuli ɔmɛ je a kɛ Filistibi ɔmɛ a ta hwumi ɔ kɛ ba a, Israel yi ɔmɛ la ke: ‘Saul gbe akpehi, se David lɛɛ e gbe akpe nyɔngmahi.’ Enɛ ɔ ha Saul je David he hunga, ejakaa a ngɔ anunyami fuu kɛ ha David pe lɛ. Se Saul binyumu Yonatan lɛɛ e ji David he hunga. E suɔ David saminya, nɛ David hu suɔ lɛ. Lɔɔ he ɔ, mɛ ni enyɔ ɔmɛ a wo a sibi si kaa a maa pee huɛmɛ daa.

David le sanku fiami saminya, nɛ Saul suɔ e la amɛ. Se ligbi ko ɔ, Saul hunga jemi ɔ ha nɛ e pee nɔ́ ko nɛ hi sãasaa. Benɛ David ngɛ sanku ɔ fiae ɔ, Saul ngɔ e we akplɔ ɔ, nɛ e fɔ konɛ e kɛ gbe David. Nɛ e de ke: ‘Ma hɛ David akplɔ kɛ pi gbogbo ɔ!’ Se David yu e he, nɛ akplɔ ɔ ya hɛ gbogbo ɔ. Lɔɔ se ɔ, Saul ka David akplɔ hɛmi ekohu se akplɔ ɔ na we lɛ. Jehanɛ ɔ, David na kaa e sa nɛ e hyɛ e he nɔ saminya.

Anɛ o kai Saul si womi ɔ lo? E de kaa e maa ngɔ e biyo ɔ kɛ ha nyumu nɛ maa gbe Goliat. Nyagbe ɔ, Saul de David ke e maa ngɔ e biyo Mikal kɛ ha lɛ, se loko e ma ha lɛ e biyo ɔ, ja e gbe a henyɛli nɛ ji Filistibi 100. Mo susu enɛ ɔ he nɛ o hyɛ! Saul susumi ji kaa Filistibi ɔmɛ maa gbe David. Se a nyɛ we nɛ a gbe lɛ, lɔɔ heje ɔ, Saul ngɔ e biyo ɔ kɛ ha David.

Ligbi ko ɔ, Saul de Yonatan kɛ e tsɔli ɔmɛ tsuo kaa e maa gbe David. Se Yonatan de e tsɛ ɔ ke: ‘Koo ye David awi. Ejakaa e pee we mo nɔ́ yayami ko. Mohu ɔ, o ná nɔ́ tsuaa nɔ́ nɛ e pee ɔ he se babauu. E ngɔ e wami kɛ wo oslaa mi kɛ gbe Goliat, nɛ o bua jɔ.’

Saul bu e bi ɔ tue nɛ e wo si kaa e be David awi yee. Lɔɔ heje ɔ, Saul ha David kpale kɛ ba e we ɔ mi, nɛ e ba bɔni lɛ sɔmɔmi ekohu. Se ligbi ko benɛ David ngɛ sanku fiae ɔ, Saul fɔ e we akplɔ ɔ ekohu kaa e ma kɛ hɛ David. David yu e he, nɛ akplɔ ɔ ya hɛ gbogbo ɔ. Enɛ ɔ ji si etɛne nɛ Saul ka David gbemi! Jehanɛ ɔ lɛɛ, David yɔse kaa e sa nɛ e tu fo!

Jamɛ a nyɔ ɔ mi nɔuu ɔ, David ho lɛ nitsɛ e we mi ya. Se Saul tsɔ ni komɛ kaa a ya gbe lɛ ngɛ lejɛ ɔ. Mikal le nɔ́ nɛ e tsɛ ɔ to kaa e maa pee ɔ. Lɔɔ heje ɔ, e de e huno ɔ ke: ‘Ke o ji hiɛ ɔ nyɔ nɛ ɔ mi ɔ, o ma gbo loko je maa na.’ Jamɛ a nyɔ ɔ mi ɔ, Mikal ye bua David nɛ e gu saflɛ mi kɛ tu fo. David hi laami tso mi maa pee jeha kpaago bɔnɛ pee nɛ Saul nine nɛ ko su e nɔ.