PAGKATAPOS gadanon ni David si Goliat, dinara siya kan hepe kan hukbo nin Israel na si Abner ki Hading Saul. Ugmahon si Saul ki David, kaya ginibo niya ining komandante sa hukbo niya asin pinaistar sa palasyo.

Paghaloy-haloy, kan magbalik an hukbo hali sa pakikilaban sa mga Filisteo, nagkaranta an kababaihan: ‘Ginadan ni Saul an ribo-ribo, pero si David manampulong ribo.’ Nauri si Saul ta mas inumaw si David imbes na siya. Pero dai nauri an aki ni Saul na si Jonathan. Padabaon niya si David, asin padabaon man siya ni David. Nagsumpaan sindang magdadanay na mag-amigo.

Matibayon magtugtog nin arpa si David, asin gustuhon ni Saul an musika niya. Pero sarong aldaw, dahil sa pagkauri, may marauton na ginibo si Saul. Kan nagtutugtog si David, sinabi ni Saul sa sadiri niya: ‘Tutuhugon ko si David sa lanob!’ * Kinua niya su garod niya asin binudyak si David. Pero nakalikay si David. Nautro an pangyayaring iyan pero nakalikay giraray si David. Aram na ngunyan ni David na dapat siyang mag-ingat na marhay.

Nagigirumduman mo su panuga ni Saul? Ipapaagom niya an aki niyang babayi sa makakagadan ki Goliat. Sinabi ni Saul ki David na puwede niyang maagom an aki niyang si Mical, pero kaipuhan niya ngunang gumadan nin 100 na Filisteo. Uyog-uyugon mo iyan! Talagang gusto ni Saul na magadan kan mga Filisteo si David. Pero dai ninda nagibo iyan, kaya ipinaagom ni Saul si Mical ki David.

Sarong aldaw, sinabi ni Saul ki Jonathan asin sa gabos niyang lingkod na gusto niyang gadanon si David. Pero sinabi ni Jonathan sa saiyang ama: ‘Dai po! Mayo man ginibong maraot saimo si David. Dakulon po ngani siyang naitabang saimo. Isinapeligro niya an saiyang buhay sa paglaban ki Goliat. Ugmahon kamo dahil diyan.’

Nagdangog si Saul sa aki niya, asin nangako na dai niya gagadanon si David. Pinabalik si David sa palasyo, asin naglingkod giraray siya ki Saul. Pero sarong aldaw, miyentras na nagtutugtog si David, binudyak na naman siya ni Saul. Nakalikay si David, asin tuminama sa lanob an garod. Pantulo na ini! Aram ni David na dapat na siyang magdulag!

Kan bangging idto, nagpuli si David sa harong niya. Pero nagsugo si Saul nin mga tawuhan para gadanon siya. Aram ni Mical an plano kan saiyang ama, kaya sinabi niya sa agom niya: ‘Kun dai ka mahali ngunyan na banggi, sa aga gadan ka na.’ Tinabangan ni Mical si David na makadulag asin pinaagi ini sa bintana. Mga pitong taon na nagtago si David sa lain-lain na lugar para dai siya madakop ni Saul.