Abahüdaguni 59

Ka uagu lanuraha Dawidi

LÁRIGIÑE láfaruni Dawidi Goliadi, aba liabin Ábünerü le hábuti lisudaranigu Saulu anügei Dawidi ñeinhin lubéi Saulu. Aba ladügüni Saulu Dawidi hábutime lisudaranigu ani barülei awinwanda lúbiñe.

Dan le hagiribudunbei súdaragu lídangiñe wuribu hama filistéana, aba heremuhan würiña: ‘Áfarati Saulu milu, ani diisi milu láfarun Dawidi.’ Aba lagimugahan Saulu, ladüga lichugún saragu inebesei lun Dawidi sügǘ lau. Ánheinti Yónatan le liráü Saulu magimuganti. Hínsiñeti Dawidi lun, hínsiñeti giñe Yónatan lun Dawidi. Ligía aba lubéi füramase hamá gamadaguabaña lan súnwandan.

Gafaraditi Dawidi árüpa, ani hínsiñeti lumúsikan lun Saulu. Gama lumoun aban weyu aba lanügüni ligimugan lun ladügün aban katei wuribati lun Dawidi. Dan le aniha lan Dawidi áfara árüpa, aba lachüürüni Saulu larufunte luagun, lariñaga: ‘Nahudurali Dawidi tóubawagu muna!’ Gama lumoun, direi lumuti Dawidi arufun. Lárigiñe, ábaya lachararun Saulu lau lachüürüni arufun luagun Dawidi. Subudi laaliti Dawidi guentó mosu lan lóunigiragun lungua sun oura.

Haritaguabagili füramasei le ladügübei Saulu? Ariñagati líchuguboun lan lisaani lun wügüri le áfaruti Goliadi hilagubei. Ábati lariñagun Saulu lun Dawidi gayara lan lanügünu Mikali, ani mosu lan láfarun 100 filistéana furumiñe. Saminabá! Le lagurabubei Saulu, lun háfaruni filistéana Dawidi. Ani masuseredunti lira, ábati líchugunu Saulu liráü lun Dawidi lun lánime weiriou.

Aban weyu aba lariñagun Saulu lun Yónatan luma houn sun lubúeingu luagu busén lan láfaruni Dawidi. Gama lumoun, aba lariñagun Yónatan lun: ‘Madügabá dañu lun Dawidi. Madügünñahagili ni kata wuribati bun. Lubaragiñe lira, íderagua laadibu. Áhurera lumuti libagari lun láfaruni Goliadi, ani dan le barihinbalin, aba bagundaarun.’

Aganba lumuti Saulu liráü, aba füramase lan luagu madügünbei lan dañu lun Dawidi. Ábaya hanügüni Dawidi lárigoun, lun leseriwidun lun Saulu kei meha furumiñe. Gama lumoun, aban weyu dan le anihán lan Dawidi áfara músika, ábaya lachüürüni Saulu arufun luagun. Aba ladireiruni Dawidi, ábati láchourun arufun tóubawagu muna. Nihán lǘrüwan wéiyaasu! Guentó subudi laali Dawidi luagu mosu lan lanurahan!

Guñoun ligía aba lidin Dawidi lúbiñoun, ani aba lóunahan Saulu wügüriña lun háfaruni hilagubei. Subuditi tun Mikali le labusenrubei túguchi ladügün. Aba tariñagun lun Dawidi: ‘Beiba áriebu le, odi haruga hilaadibume.’ Guñoun ligía aba tíderaguni Mikali Dawidi lun lanurun lídangiñe aban funedera. Yarafa lun sedü irumu lau Dawidi aramudagua luéi Saulu, ani sügüti lídangiñe aban fulasu lidoun aban.

1 Samueli 18:1-30; 19:1-18.