OJUKA rire David Goliátpe, Abner, pe Israel ehérsito omoakãva, ogueraha chupe Saúl rendápe. Saúl oguerohoryeterei Davídpe. Ojapo chugui mburuvicha ijehérsitope ha ogueraha chupe oiko hag̃ua pe rréi rógape.

Upe rire, ojevývo pe ehérsito oñorairõhaguégui filisteokuéra ndive, umi kuñanguéra opurahéi: ‘Saúl ojukáma heta miles, péro David heta diez mílespe’. Saúl iselóso, pórke Davídpe oñemombaʼeguasuve chugui. Péro Saúl raʼy Jonatán naiñenvidiósoi. Ohayhu Davídpe, ha David avei ohayhu chupe. Upévare, opromete ojupe oikotaha oñoamígoramo opa árape.

David ombopu porãiterei árpa, ha Saúl ohenduse músika haʼe ombopúva. Péro peteĩ árape, pe envídia tuichaite oguerekóva Saúl ojapouka chupe peteĩ mbaʼe ivaietereíva David rehe. Ombopu jave haʼe pe árpa, Saúl ojagarra ilánsa ha ohaʼã chupe, heʼívo: ‘Aikutúta Davídpe pare rehe!’. Péro David ojehekýi chugui. Upe rire, Saúl ohaʼã jey Davídpe peteĩ lánsape. Koʼág̃a David oikuaáma oñeñangarekovaʼerãha opa árape.

Nemanduʼápa pe promésa Saúl ojapovaʼekuére? Heʼivaʼekue pe kuimbaʼe ojukáva Goliátpe, upévape omeʼẽtaha itajýra hembirekorã. Hasy peve Saúl heʼi Davídpe ikatumaha ogueraha itajýra Micálpe hembirekorã, péro ojuka raẽ vaʼerã 100 filistéope. Epensamíntena! Saúl ohaʼarõ umi filisteokuéra ojuka Davídpe. Péro upéva ndojehúi, ha Saúl omeʼẽ Davídpe itajýra Mical hembirekorã.

Peteĩ árape Saúl heʼi Jonatán ha hembiguaikuérape ojukaseha Davídpe. Péro Jonatán heʼi itúvape: ‘Ani rejapo mbaʼeve David rehe. Haʼe arakaʼeve ndojapóiva nderehe mbaʼeve ivaíva. Upéva rangue, haʼe nepytyvõ. Omoĩvaʼekue hekove jejopy vaípe ojukárõ guare Goliátpe, ha rehechárõ guare upéva, nembovyʼavaʼekue’.

Saúl ohendu itaʼýrape, ha opromete ndojapomoʼãiha mbaʼeve ivaíva David rehe. David oho jey oservi Saúlpe ymaguaréicha. Upevére, peteĩ árape David ombopu jave músika, Saúl ohaʼã jeýma Davídpe peteĩ lánsape. David ojehekýi jey chugui, ha pe lánsa ojekutu pe pare rehe. Kóva oikóma tres vése! Koʼág̃a David oikuaáma okañyvaʼerãha!

Upe pyharépe David oho hógape, péro Saúl omondo kuimbaʼekuéra ojuka hag̃ua chupe. Mical oikuaa mbaʼépa ojapose itúva. Upévare heʼi iménape: ‘Nderehóiramo koʼág̃a, koʼẽrõ g̃uarã remanóta’. Upe pyharépe Mical oipytyvõ Davídpe osẽ hag̃ua peteĩ ventána rupi ha okañy. Haimete siete áño David oiko opárupi okañyhápe Saúlgui.