David ma taura mena raSaul
EHUNGI 59
David ma taura mena raSaul
INDU David tja za nokuzepa Goliat, omuhongore waIsrael wovita Abner we mu eta ku Saul. Saul wa ri nonyuṋe tjinene na David. Eye we mu tjita omuhongore wovita nu e mu twara kondjuwo yombara ma kature ngo.
Kombunda otjimbumba tjovarwe tji tja kotoka okuza kokukarwisa Ovafilisti, ovakazendu va uta okuimbura ave tja: ‘Saul wa zepa omayovi, nungwari David omayovi omirongo.’ Ihi tja tjita kutja Saul ma ṱeruru, mena rokutja David wa pewa ondjozikiro onyingi pu Saul. Nungwari omuzandu waSaul Jonatan ka ri neruru. Eye wa suverere David tjinene nu David wina wa suverere Jonatan. Mena ranao owo va tjita omakwizikiro kutja mave rire omapanga aruhe.
David wa ri omunyande omuwa wotjiharpe, nu Saul wa suverere omizumbi mbyaa nyanda. Nungwari eyuva rimwe eruru raSaul ra tjita kutja ma tjite otjiṋa otjihimise tjinene. David ngunda ama nyanda otjiharpe, Saul wa toora enga re e ri yumbu natja: ‘Ami me papere David kekuma!’ Nungwari David wa yepa nu enga re mu parwisa. Kombunda Saul wa parwisa David nenga rukwao. Mena ranao David nambano wa tjiwa kutja ma sokukengeza tjinene.
Ove mo zemburuka omakwizikiro Saul nga tjita? Eye wa tja ma yandja omusuko we ma rire omukazendu womurumendu ngu ma zepa Goliat. Saul korusenina wa raera David kutja nga toore omusuko we Mikal, nungwari ma sokuzepa Ovafilisti ovanavita 100. Ripura na iho! Saul tjiri wa ri nomaundjiro wokutja Ovafilisti mave zepa David. Nungwari owo kave mu zepere, okutja Saul wa yandja omusuko we ma rire omukazendu waDavid.
Eyuva rimwe Saul wa raera Jonatan novakarere ve avehe kutja eye u vanga okuzepa David. Nungwari Jonatan a rire tja tja ku ihe: ‘O hihamisa David. Eye ke ya rora okutjita otjiṋa otjivi kove. Posi yokutja avihe mbya tjita kove vya ri ombatero onene kove. Eye wa twa omuinyo we moumba indu tja zepa Goliat, nu ove tji we tji muna, ove wa ri nonyuṋe natjo.’
Saul wa puratena komuzandu we, nu eye we mu kwizikira kutja kena ku tjita otjipo ku David. David wa kotorwa, nu wa uta okukarera Saul mondjuwo ye rukwao otja tjaa tjiti rukuru. Nungwari eyuva rimwe ngunda David ama nyanda omizumbi, Saul wa yumba David nenga re rukwao. David wa yepa nu enga ra veta mekuma rondjuwo. Ihi tja ri otjikando otjitjatatu! David nambano aa tjiwa kutja ma sokutaura!
Ouṱuku mbo David wa ya kondjuwo ye. Nungwari Saul wa hinda ovarumendu tjiva ve ke mu zepe. Mikal aa tjiwa imbi ihe mbya tyere okutjita. Mena ranao eye wa raera omurumendu we: ‘Tji u hi nakuyenda ouṱuku mbunombwi, muhuka tjandje wa ṱu.’ Ouṱuku mbo Mikal wa henisira David moruiho. Oure wozombura mangara hambombari David aa ṱara potuveze pekepeke kokutja Saul e he mu munu.
