Ngewa ya 59: Kĩla Kyatumie Ndaviti Asemba Akĩe
ĨTINA wa Ndaviti kũaa Ngoliathu, Avineli mũnene wa ita sya Isilaeli niwamũetie kwa Saulo. Saulo nĩwendeeiw’e nĩ Ndaviti mũno. Na amũtw’a mũnene wa ita syake na amwosa ekalae nyũmbanĩ ya mũsumbĩ.
Na ĩtina, yĩla ita syasyokete syumĩte kũkita na Avilisiti, aka maina mayasya: ‘Saulo nĩũaĩte ngili syake, ĩndĩ Ndaviti ngili syake makũmi.’ Na ũndũ ũsu watuma Saulo akwatwa nĩ kĩwĩu, nũndũ Ndaviti nĩwanengiwe ndaĩa nene kwĩ we. Ĩndĩ mwana wa Saulo Yonathani ndaĩ na kĩwĩu. Endete Ndaviti mũno, o nake Ndaviti nĩwamwendete. Kwoou matianĩa ũtianĩo ene kwa ene kana makeethĩawa me anyanya ĩvinda yonthe.
Ndaviti aĩ mũingi mũseo mũno wa mbeve, na Saulo nĩwendeeaw’a nĩ mbathi ila waingaa. Ĩndĩ mũthenya ũmwe kĩwĩu kya Saulo nĩkyatumie eka ũndũ wa kũtelemya. Ndaviti o aendee na kũinga mbeve, Saulo nĩwoosie ĩtumo na ayĩkya, ayasya: ‘Nĩmũtonyanĩsya Ndaviti na ũkũta!’ Ĩndĩ Ndaviti aeleva, na ĩtumo yamũvĩtya. Na ĩtina Saulo amũvĩtya Ndaviti ĩngĩ na ĩtumo yake. Kwoou Ndaviti amanya kana no mũvaka esũvĩe mũno.
We nũũlilikana wĩvĩto ũla Saulo weevĩtie? Aisye kana akanengane mwĩĩtu wake atw’ĩke mũka wa mũndũ ũla wĩũaa Ngoliathu. Ĩtina vyũ Saulo nĩwamwĩie Ndaviti kana nũtonya kwosa mwĩĩtu wake Mikali, ĩndĩ no nginya mbee oae andũ 100 katĩ wa amaitha moo Avilisiti. Kwasũanĩa ũndũ ũsu? Saulo eekwatasya kana vate nzika Avilisiti makoaa Ndaviti. Ĩndĩ mayaamũaa, na kwoou Saulo anengane mwĩĩtu wake atw’ĩke mũka wa Ndaviti.
Mũthenya ũmwe Saulo nĩwatavisye Yonathani na athũkũmi make onthe kana nũkwenda kũaa Ndaviti. Ĩndĩ Yonathani eea ĩthe wake: ‘Ndũkamwĩke Ndaviti ũndũ mũthũku. Ndaakũvĩtĩsya o na ĩndĩĩ ũndũnĩ o na wĩva. Vandũ va ũu, kĩla ũndũ w’onthe wĩkĩte wĩthĩĩtwe wĩ ũtethyo mũnene mũno kwaku. Alikily’e thayũ wake mũisyonĩ yĩla wooaie Ngoliathu, na yĩla we woonie ũndũ ũsu, watana.’
Saulo nĩweethukĩĩisye mwana wake, na asya kana ndakamwĩka Ndaviti naĩ. Ndaviti nĩwatũngiwe, na aendeea na kũmũthũkũma Saulo nyũmbanĩ yake ĩngĩ o ta tene. Ĩndĩ, mũthenya ũmwe, Ndaviti aendee na ũkũna wathi, Saulo nĩwekisye ĩtumo yake ĩngĩ kũmwelekela. Nake Ndaviti aeleva, na ĩtumo yatonya ũkũta. Yĩĩ nĩyo yaĩ ĩvinda ya katatũ! Kwoou Ndaviti amanya kana no nginya asembe akĩe!
Ũtukũ ũsu Ndaviti nĩwaendie nyũmba kwake mwene. Ĩndĩ Saulo atũma andũ makamũae. Mikali nĩweesĩ ũndũ ĩthe ũvangĩte kwĩka. Kwoou amwĩa mũũme wake: ‘Ethĩwa ndwĩsemba ũkĩe ũtukũ ũũ, ũnĩ ũkooawa.’ Ũtukũ ũsu Mikali atetheesya Ndaviti atoloke kwĩsĩla ndĩlĩsyanĩ. Kwa myaka ta mũonza, Ndaviti aĩ no nginya evithe kũũ na kũũ nĩ kana Saulo ndakamwone.
1 Samueli 17:55-58; 1 Samueli 18:1-30; 19:1-18.
Makũlyo
- Saulo eew’ĩaa Ndaviti kĩwĩu nĩkĩ, na Yonathani mwana wa Saulo aĩ na kĩvathũkany’o kyaũ?
- Mũthenya ũmwe kweekĩkie ata yĩla Ndaviti waingĩaa Saulo mbeve?
- Saulo aisye no nginya Ndaviti eke ata mbee wa kũtwaa Mikali mwĩĩtu wake atw’ĩke mũka, na Saulo aisye ũu nĩkĩ?
- Yĩla Ndaviti wamũingĩaa Saulo mbeve, nĩ kyaũ kyeekĩkie ĩvinda ya katatũ, tondũ visa ũũ ũkwonany’a?
- Mikali etetheeisye ata kũvonokya thayũ wa Ndaviti, na ĩndĩ Ndaviti aĩ no nginya eke ata kwa myaka mũonza?
Makũlyo ma kwongeleela
- Soma 1 Samueli 18:1-30.
Wendo mũlũmu ki wa Yonathani kwa Ndaviti waelekanasya ata wendo katĩ wa “malondu angĩ” na “ĩĩthya ĩnini”? (1 Sam. 18:1; Yoa. 10:16; Lk. 12:32; Nzek. 8:23)
O na vala Yonathani nĩwe waaĩlĩtwe nĩkũtiĩwa ũsumbĩ nĩ Saulo, ĩandĩko ya 1 Samueli 18:4 yĩonany’a ata kana Yonathani nĩweenyivĩisye kwa nzĩa ya mwanya ũla wanyuvĩtwe atw’ĩke mũsumbĩ?
Ngelekany’o ya Saulo yĩonany’a ata kana kĩwĩu nĩkĩtonya kũtuma mũndũ eka naĩ nthũku mũno, na ũndũ ũsu wĩtũnenga ũkany’o mwaũ? (1 Sam. 18:7-9, 25; Yak. 3:14-16)
- Soma 1 Samueli 19:1-17.
Yonathani alikilye thayũ wake mũisyonĩ ata yĩla waneenie Saulo? (1 Sam. 19:1, 4-6; Nth. 16:14)
