LAJ David ak xkamsi laj Goliat naq laj Abner, laj jolominel rehebʼ laj puubʼ re Israel, kixkʼam laj David rikʼin laj Saul. Laj Saul kixkʼe ajwiʼ laj David choʼq aj jolominel saʼ xyanqebʼ laj puubʼ ut kixkʼul saʼ rochoch.

Naq ebʼ laj puubʼ keʼsutqʼiik chi yalok rikʼinebʼ laj Filisteo, ebʼ li ixq keʼok xyeebʼal: ‹Naabʼal kixkamsihebʼ laj Saul, abʼan laj David kixqʼax ru xkʼihal kixkamsi›. Laj Saul kichalk xjosqʼil xbʼaan naq keʼxnima ru laj David chiru aʼan. Abʼan laj Jonatan, li ralal laj Saul, moko kixkaqali ta laj David. Laj Jonatan ut laj David nekeʼxra ribʼ, joʼkan naq keʼxye naq junelik teʼwanq saʼ amiiwil.

Laj David naxnaw xchʼeebʼal li aarp ut laj Saul nawulak chiru rabʼinkil. Laj Saul naxkaqali laj David. Saʼ jun kutan naq laj David yook xchʼeebʼal li aarp, laj Saul kiwakli ut kixkut li xjutzʼ chʼiichʼ saʼ xbʼeen laj David. Tojaʼ naq kixye laj Saul: ‹Ok we xtʼojbʼal laj David chiru tzʼak›. Abʼan laj David kixkol ribʼ chiru. Laj Saul toj kixkut wiʼ chik li xjutzʼ chʼiichʼ saʼ xbʼeen laj David. Naq laj Saul kixbʼaanu aʼin, laj David kixkʼe reetal naq yalaq joqʼe naru tkamsiiq.

Ma jultik aawe naq laj Saul kixyeechiʼi li xrabʼin re li winq li tkamsinq re laj Goliat. Joʼkan naq laj Saul kixye re laj David naq tixkʼe li xrabʼin re, wi tixkamsi 100 ebʼ aj Filisteo. Laj Saul kiraj naq ebʼ laj Filisteo teʼxkamsi laj David, abʼan moko kikʼulmank ta chi joʼkan. Laj Saul, kixkʼe li xrabʼin choʼq rixaqil laj David.

Saʼ jun kutan laj Saul kixye re laj Jonatan ut kixye rehebʼ li xmoos naq traj xkamsinkil laj David. Abʼan laj Jonatan kixye re laj Saul: ‹Maachʼeʼ laj David. Maakʼaʼ xmaak chaawu. Xatxtenqʼa naq kixkamsi laj Goliat ut naq kisutqʼiik chaq chi yalok kisahoʼk saʼ aachʼool naq xaawil ru›.

Laj Saul kixye re li ralal naq inkʼaʼ tixchʼeʼ laj David. Joʼkan naq laj David kiʼok chi kʼanjelak rikʼin laj Saul. Ut naq laj David yook xchʼeebʼal li aarp, laj Saul kixkut wiʼ chik li xjutzʼ chʼiichʼ saʼ xbʼeen. Abʼan laj David kixkol ribʼ, joʼkan naq li chʼiichʼ kiʼok chiru li tzʼak. Aʼin li rox sut naq kikamsiik raj laj David. Laj David kixye saʼ xchʼool naq t-eleliq.

Saʼ li qʼoqyink aʼan, laj David xko saʼ rochoch, abʼan ak xtaqlaak xkamsinkil xbʼaan laj Saul. Naq li xMical kixnaw li tixbʼaanu li xyuwaʼ, kixye re laj David: ‹Wi inkʼaʼ nakatxik saʼ li qʼoqyink aʼin, tateʼxkamsi›. Joʼkan naq li xMical kixtenqʼa laj David chi elk saʼ bʼentaan. Kachʼin chik ma wuqubʼ chihabʼ kixmuq ribʼ laj David chiru laj Saul. Ut kiwank saʼ jalan jalanq chi naʼaj.