DAVIDA byo aipayile Goliata, Abina mukulumpe wa nzhita ya bena Isalela, wamutwajile kwi Saulo. Saulo watemenwe bingi byaubile Davida. Wamutongwele kwikala mukulumpe wa nzhita yanji kabiji wamusendele keekale ne ku nzubo ya mfumu.

Palutwe kacheche, nzhita byo yabwelele kufuma na kulwa na bena Filishitiya, banabakazhi baimbilenga’mba: ‘Saulo waipayako biumbi, pakuba Davida waipayako makumi a biumbi.’ Kino kyalengejile Saulo kuba kichima, mambo Davida wanemekelwe kukila Saulo. Bino Yonafwanyi, mwana wa kwa Saulo kechi waubile kichima ne. Wamutemenwe bingi Davida kabiji Davida naye wamutemenwe Yonafwanyi. Mu jino jishinda, balayañene’mba bakatwajijila kwikala balunda na muntu.

Davida wayukile bingi kwimba pa jisense kabiji Saulo watemenwe bingi kwimba kwanji. Bino, juba jimo, kichima kyanji Saulo kyamulengejile kuba kintu kyatama. Davida byo aimbilenga pa jisense, Saulo washikwile jifumo janji ne kwijitaya, ne kwamba’mba: ‘Naya namwase Davida, jikasumpe ne mu lubumbulu!’ Bino, Davida wijileyele, japitatu kusu. Kabiji kimye kikwabo Saulo wabwezhezhepo kutaya jifumo, bino Davida wijileyele jikwabo. Pano Davida wayukile amba wafwainwe kujimuka.

Wavuluka mulaye Saulo ye alayile nyi? Waambile’mba ukapana mwananji wa mukazhi ku mwanamulume ukepaya Goliata kwikala ke mukazhanji. Kyapeleleko, Saulo waambijile Davida amba ukasenda mwananji wa mukazhi, aye Mikala, bino amba patanshi wafwainwe kwipaya bena Filishitiya 100. Akikilangulukepotu! Saulo wakebelenga’mba bena Filishitiya bakamwipaye Davida. Pano bino, kechi bamwipayile ne. Onkao mambo, Saulo wapaine mwananji kwi Davida kwikala ke mukazhanji.

Juba jimo, Saulo waambijile Yonafwanyi ne bakalume banji bonse amba ukeba kwipaya Davida. Bino Yonafwanyi waambijile bashanji amba: ‘Kange mumube Davida kintu kyatama ne. Kechi wimubapo kala kintu kyatama anweba ne. Kabiji mingilo yonse yo emwingijila imukwasha bingi. Wabikile bumi bwanji mu kizumba pa kwipaya Goliata kabiji pa kumona kino kyaubiwe, mwatemenwe bingi.’

Saulo waumvwijile byaambile mwananji kabiji waambile’mba kechi ukamuba Davida kintu kyatama ne. Davida bamubwezhezhe kabiji watendekele jikwabo kwingijila Saulo mu nzubo yanji byonka byo aingijilenga patanshi. Nangwa byonkabyo, juba jimo, kimye Davida kyo aimbilenga, Saulo watayile jifumo janji amba ase Davida. Davida wijileyele jifumo, jakasumpiletu mu lubumbulu. Kino kyajinga kimye kya busatu! Davida wamwene’mba pano wafwainwa kunyema!

Bonkabwa bufuku Davida wanyemejile ku nzubo yanji. Pano bino, Saulo watumineko bantu bamo amba bamwipaye. Mikala wayukile byakebelenga kuba bashanji. Kepo abujile mwatawanji amba: ‘Inge mubule kunyema buno bufuku, kesha bakemwipaya.’ Bonkabwa bufuku, Mikala wamukwashishe Davida kulupukila pa kipenze. Pa myaka itanu na ibiji, Davida waendelengatu na kufyamuzhuka mu mapunzha apusana pusana kuchina’mba Saulo wakamutana ne kumwipaya.