MƐƐ Deeve dii Koolaya, mi Abina, masa puaa chɔuwa le Isɔluɛi, huŋ a ndu naa Sɔɔl cha. Mi Sɔɔl naŋ kɔl tau a Deeve. Mbo siiŋguu ndu masaa le puaa nduaa chɔuwa. Nduyɛ mbo chua ndu le mbo wa o chiɛi lemasaa niŋ.

Mɛɛ puaa chɔuwa fula paale pilɛ Filiitiaŋnda chɔulabaa, mi waŋlaanduaa wa chondei solio aa: ‘Sɔɔl dii waalaŋ, kɛ Deeve dii waalaŋ o waalaŋ niŋ.’ Mi hei tosa mi Sɔɔl kandu paŋalaa, kanifuule Deeve sɔla bɛɛleŋ mbo hiau ndu Sɔɔl. Kɛ po Sɔɔllo, Chɔnataŋ ndoo paŋala Deeve le. Ndoo kaala bɔɔ Deeve, nduyɛ Deeve bɛɛ ndoo kaala bɔɔ Chɔnataŋ. Lelaŋ, mi nda ŋiɔɔŋ yii kpemaa maa a cho wa chaŋyɛi lefafɛɛŋ.

Deeve ndoo chaa bɔɔ towaa lɔɔ. Sɔɔl yɛ ndoo hɛnaŋ bɔɔ a nyɛ chaa Deeveo. Kɛ paale pilɛ mi kɔl paŋalɛi wa Sɔɔl niŋ le Deeveo nyindu ndu mbo tosa suɛi wɔɔŋnde. Mɛɛ Deeve wa towaa lɔɔ, mi Sɔɔl chua bal ndɔɔ mbo wuu ndu a diomndeŋ kɔɔli aa: ‘I baŋ ndɔɔ Deeve o chiɛiyo!’ Kɛ mi Deeve biamnuŋ, okoŋ mi ballo biandu ndu. Fulaa okoŋ kɔɔli, mbo biandu ndu vɛlɛ a bal ndɔɔ. Mi Deeve sina niko maa mɛɛ mbo wa yekeŋ.

A loonuŋ buŋgɛi Sɔɔl ndoo chua ve? Mbo dimi maa o cho po dii Koolaya wo chua ndɔɔ ke le mbo wa laandɔ. O mɛɛlulaŋ niŋ kpɔŋ, mi Sɔɔl dimul Deeve maa le mbo ke ndu Maika chuandɔ maa laandɔ, o diilullɔ ndu fɛŋ yaamɔɔwa Filitiŋ 100. Yiyaŋndɔ a keŋ! Sɔɔl ndoo wa ko kɔl maa Filiitiaŋnda cho Deeve diyɔɔ. Kɛ a tiu ndu ba le, mɛɛ mbo ke niko Deeve chua ndɔɔ le mbo wa laandɔ.

Paale pilɛ mi Sɔɔl dimul Chɔnataŋ a buɛiyaa nduaa kpou maa o yeema mbo dii Deeve. Kɛ mi Chɔnataŋ mulul finya ndɔ aa: ‘Yɔŋ ndu nyɛ o nyɛ le, paale pilɛ bɛɛ o tosallɔ num iwɔɔŋ te. O mala num tau a nyɛ o nyɛ o tosa. Mbo lueŋ ndupila o kpundɔɔ niŋ le Koolaya diyɔɔ. Mɛɛ ŋ tuei keŋ, ma naŋ kɔl tau.’

Mi Sɔɔl yaŋ po ndɔɔ nilaŋ, mbo chua buŋgɛi maa o cho Deeve nyɛ yɔŋ te. Mɛɛ ma huŋ vɛlɛ a Deeve o Sɔɔllo chiɛiniŋ, nduyɛ mbo wa ndu baalaa tosallo maa paandu koni. Paale pilɛ mɛɛ Deeve wa nyɛ chaa lɔɔ, mi Sɔɔl wuu ndu vɛlɛ ballo choo. Mi Deeve biamnuŋ okoŋ mi ballo huŋ baŋnuŋ o chiɛiyo. Bɛmbɔɔ yaandɔɔ cho hoo ni. O hei Deeve sina niŋ ni maa mɛɛ mbo nyaanuŋ.

Mi Deeve kua ichɔl koŋ o ndulo chiɛiniŋ. Okoŋ, mi Sɔɔl viam puaa ndu kɔɔli le ndu diyɔɔ. Kɛ Maika ndoo sina nyɛ finya ndɔ tuuwo. Lelaŋ, mbo dimul pɔnɔ ndɔ aa: ‘Te a nyeenuŋ chuɛllɛŋ te, siɔdii a cho wa o vilɛiyo.’ Mɛɛ mi Maika mala Deeve mbo fula o wundɛiyo. Le wɔsioŋ ŋɔmmɛu Deeve wa keiyo viŋi viŋiŋndo o fondala yɛ yɛlaŋ halikpeŋ Sɔɔl cha ndu le.