Chuma Mwachinyina Ndavichi
Chihande 59
Chuma Mwachinyina Ndavichi
NDAVICHI hakujiha Ngolyate, mukulwane wamaswalale javaIsalele, Avanele, hikumuneha kuli Saulu. Saulu namwivwila Ndavichi kuwaha. Hikumupwisa mukulwane wamaswalale nakumutwamisa kuzuvo yamwangana.
Jino, maswalale hakukinduluka kujita vanalu navaFwilishite, mapwevo hikwimba ngwavo: ‘Saulu najihi makombakaji, oloze Ndavichi najihi tununu twenyi.’ Echi chinalingisa Saulu kwivwa lwiso, mwomwo Ndavichi vanamuvumbika kuhambakana Saulu. Oloze mwanaSaulu, Yonatane ikiye lwiso pimbi. Namuzange Ndavichi chikuma, kaha naNdavichi nawa nazange Yonatane. Ngocho vosena hinavalishika lushiko ngwavo navapwanga lika masepa.
Ndavichi apwa muka-kwimba kanawa kalyalya, kaha Saulu azanga myaso yenyi eji kwimbanga. Oloze likumbi limwe lwiso lwaSaulu lwamulingishile kulinga chuma chachipi. Shimbu Ndavichi anakwimba kalyalya, Saulu kumbata likunga nakumwasa, ngwenyi: ‘Nangumupapalila Ndavichi kumbango!’ Oloze Ndavichi himwalihenga, kaha likunga lweza. Saulu mwamulweza cheka Ndavichi nalikunga lyenyi. Ndavichi hanejiva jino ngwenyi atela kuzangama.
Unakwanuka lushiko lwaSaulu? Ambile ngwenyi mwakahana mwanenyi wapwevo kupwa pwevo lyamutu mwakajiha Ngolyate. Jino Saulu hikulweza Ndavichi ngwenyi ambate mwanenyi wapwevo, Mikale, oloze kuvanga ajihe vaka-kole vaFwilishite 100. Chuma kana vayaya! Saulu nafwelela nge Ndavichi navamujiha kuli vaFwilishite. Oloze chiku, shikaho Saulu hikuhana mwanenyi apwenga pwevo lyaNdavichi.
Likumbi limwe Saulu mwalweza Yonatane navangamba jenyi vosena ngwenyi anakusaka ajihe Ndavichi. Oloze Yonatane mwalweza ise ngwenyi: ‘Kanda kujiha Ndavichiko. Kanda akupihiseho lyehi. Oloze vyuma vyosena nalingi vinapu vyakukafwa ove. Ahakile mwono wenyi muponde hakujiha Ngolyate, kaha ove hakuchimona wevwile kuwaha.’
Saulu himwevwilila mulizu lyamwana, nakulishinga kukahona kujiha Ndavichi. Ndavichi vamunehele cheka, nakuzachila Saulu muzuvo yenyi ngana mwamwaka. Oloze likumbi limwe, shimbu Ndavichi anakwimba myaso, Saulu hikumwasa cheka Ndavichi likunga. Ndavichi mwalihengalyo, kaha likunga kuya mumbango kipu. Aka hikamuchitatu! Ndavichi hanamono ngwenyi atela kuchina jino!
Ufuku uze Ndavichi hikuya kuzuvo yenyi. Jino Saulu mwatuma vatu kuya nakumujiha. Mikale nejiva chuma anakusaka ise kulinga. Hikulweza lunga lyenyi ngwenyi: ‘Nge kaweshi kuchina ufuku unoko, kaha hamene mukapwa uchivimbi.’ Ufuku kana Mikale hikumukafwa Ndavichi alovokele munjanena. Hamyaka kafwe yitanu nayivali Ndavichi aswamwojokelenga muvihela vyeka navyeka kuchina kumuwana kuli Saulu.