Sturka 59

Dia Muni Debit Plapan Ba

DEBIT Gulaiat ra ikan ningkara, Abner Israel war aiklaklabra daknika lalka ba mita Sâl ra brihwan. Sâl mita Debit ra ai aiklaklabrika daknika ra lalka kum baku mangkan bara yaban king watla ra takaskan.

Baha ningkara, war aiklabaia daknika ba Pilistain nani wal aiklabisi balan taim, mairin nani ba naku aiwani kan: ‘Sâl ba waitna tausin ikan, Debit lika 10 tausin.’ Sâl ba lawan, Debit ra kau kulkanka yabi kan ba mita. Sakuna Janatan Sâl luhpia waitna ba tatumra apia kan. Witin Debit ra latwan kaiki kan, bara Debit sin pana witin ra latwan kaikan. Baha mita, witin nani pana pana pramis daukan ban kaiara pana bangwi kaia.

Debit, arp ba uba pain kangbi kan, bara Sâl ba, Debit tiun nani puli kan ba uba laik kan. Sakuna Sâl ba uba tuman laka tara bri kan ba mita, yu kum Debit mapara diara saura kum daukan. Debit arp kangbi kan pyua ra, Sâl mita witin ra ai langsika lulki, win: ‘Debit ba utla tnayara sabi dingkamna!’ Sakuna Debit langsika ba wina tnayara taui swakwan. Kaina tanira, Sâl mita kli Debit ra langsika wal sabi ikra munan. Nanara Debit ba nu kan ban ai kan kahbi tauki kaia kan.

Sâl pramis daukan ba kupiam kraukisma ki? Ani waitnika Gulaiat ra ikbia ba ai luhpia mairin ba maîa baku yabaia win. Bara las kat Sâl mita Debit ra ai luhpia mairin Mikal ba ai maîa baku bribia win, sakuna pas ba Pilistain 100 ra ikaia sa. Man luki kais! Sâl bila kaiki kan Pilistain nani mita Debit ra ikbia. Sakuna baku takras kan, bara Sâl ai luhpia mairin ba Debit ra maîa baku yaban.

Yu kum Sâl mita Janatan bara ai albika nani ra win, witin Debit ra ikaia want ba. Sakuna Janatan mita win: ‘Debit ra saura munpara. Witin aima kumira sin man ra saura mai munras. Baha watlika ra, man ra help mai munan. Gulaiat ra ikan pyua ra ai rayaka ba pât ra kahban kan, bara witin ra kaikram taim, lilia takram.’

Sâl ba ai luhpia bila wali, pramis munan Debit ra saura munaia apia. Debit ra kli brihwan, bara witin kli Sâl dukya daukan. Ban sakuna, yu kum lawana tiunka puli kan pyua ra, Sâl mita kli langsa ba Debit ra lulkan, sakuna witin tnayara tauan bara, langsika ba utla tnaya kat wih diman. Naha ba aima yumhpika kan! Debit ai dara walan plapaia pyua kan ba!

Baha tihmika Debit ai watla pali ra wan, sakuna Sâl waitna nani blikan ikbia dukyara. Mikal ba nu kan ai aisa dia daukai kan ba. Bara Debit ra win: ‘Na tihmia mahka was, apia sa kaka yauhka pat pruram kaisma.’ Baha tihmika Mikal mita Debit ra help munan windarku swakwaia. Witin 7 mani baku Sâl sia plis kum wina wala ra yukuwi tauki kan.

1 Samyuil 18:1-30; 19:1-18.