BIHAEN David hem killim dae Go·liʹath, army chief bilong Israel, Abʹner, hem tekem hem kam long Saul. Saul hem hapi tumas long David. Hem mekem hem kamap wanfala chief bilong army bilong hem and tekem hem for stap long haos bilong king.

Bihaen, taem army kam bak from wanfala faet witim olketa Phi·lisʹtine, olketa woman singsing olsem: ‘Saul hem killim dae plande thousand, bat David staka thousand.’ Diswan mekem Saul jealous bikos David kasem moa honor winim hem. Bat son bilong Saul, Jonʹa·than, hem no jealous. Hem barava lovem David, and David lovem Jonʹa·than tu. So tufala promisim each other for fren olowe.

David hem savve tumas hao for pleim harp, and Saul laekem music wea hem pleim. Bat wanday jealous feeling wea Saul garem mekem hem duim wanfala barava nogud samting. Taem David hem pleim harp, Saul tekem spia and torowem long hem, and sei: ‘Bae mi spiarim David long wall!’ Bat David hem jamp, and spia missim hem. Bihaen, Saul missim David moa witim spia bilong hem. So David savve nao hao hem mas careful.

Waswe, iu rememberim promis wea Saul hem talem? Hem sei hem bae givim dota bilong hem for kamap waef bilong man wea killim dae Go·liʹath. So Saul sei David savve tekem dota bilong hem Miʹchal, bat firstaem hem mas killim dae 100 enemy Phi·lisʹtine. Tingim datwan! Saul barava hope olketa Phi·lisʹtine bae killim dae David. Bat olketa no duim datwan, so Saul givim dota bilong hem for kamap waef bilong David.

Wanday Saul talem Jonʹa·than and evri servant bilong hem hao hem want for killim dae David. Bat Jonʹa·than sei long dadi bilong hem: ‘No spoelem David. Hem nating duim eni rong samting long iu. Bat, evri samting wea hem duim hem helpem iu. Hem putim laef bilong hem long danger taem hem killim dae Go·liʹath, and taem iu lukim datwan, iu hapi.’

Saul hem lisin long son bilong hem, and hem promis for no spoelem David. Olketa tekem David kam bak, and hem servem Saul moa long haos bilong hem olsem bifor. Bat, wanday, taem David hem pleim music, Saul torowem spia bilong hem moa long David. David kwiktaem muv, and spia hem hitim wall. Diswan hem mek-thri taem! David savve nao hem mas ranawe!

Datfala naet, David go long haos bilong hem. Bat Saul sendem samfala man for killim hem dae. Miʹchal savve wanem dadi bilong hem plan for duim. So hem talem hasband bilong hem: ‘Sapos iu no ranawe tunaet, tumoro iu dae nao.’ Datfala naet Miʹchal helpem David for go aot long wanfala window and ranawe. For samting olsem sevenfala year David mas haed long olketa difren ples mekem Saul no savve faendem hem.