CHIʼ ri David ukamsan chi Goliat, Abner ri ajkʼamal bʼe chike ri ajchʼoj rech Israel xukʼam bʼi David rukʼ Saúl. Saúl xubʼan ajkʼamal bʼe che ri David pa kiwiʼ rajchʼoj, rumal wariʼ David xkanaj kan pa rachoch ri ajawinel.

Chiʼ ri ajchʼoj xetzalij lo pa chʼoj kukʼ ri filisteos, ri täq ixoqibʼ xkebʼixoj wariʼ: ‹Saúl xeʼukamsaj kʼi are kʼu ri David xeʼukamsaj sibʼalaj e kʼi›. Rumal wariʼ sibʼalaj itzel xunaʼ ri Saúl, rumal che are xyaʼ nim uqʼij ri David. Tekʼuriʼ Jonatán junam ta rukʼ ri utat ubʼiʼ Saúl. Xa kuloqʼoqʼej ri David, xuqujeʼ ri David kuloqʼoqʼej ri Jonatán. Rumal laʼ, xkebʼij che kkeyaʼ ta kan ubʼanik kachiʼl kibʼ.

David sibʼalaj xkun che ukojik ri arpa, ri Saúl utz kuta ri bʼixonik kubʼan ri David rukʼ ri arpa. Xopan jun qʼij rumal ri itzelal kʼo pa ranimaʼ ri Saúl xubʼan che, che xraj xukamsaj ri David. Chiʼ tijan kbʼixon rukʼ ri arpa, Saúl xuyek ri nim raqan uchʼichʼ tekʼuriʼ xukʼaqabʼej che ri David, chiʼ tijan kubʼij wariʼ: ‹¡Kinqʼosij, o kinbʼajij, ri David che ri xan!› Xchaʼ. Ri David xkunik xanmaj (xomjek) chuwäch. Tekʼuriʼ Saúl xukʼaq chi jumul ri nim raqan uchʼichʼ chirij David. David xrilo che rajawaxik sibʼalaj kuchajej ribʼ.

¿La kpe pa ajolom ri xutzujuj ri Saúl nabʼe kanoq? Xubʼij che kuya ri umiʼal che ri achi jachin kukamsaj Goliat. Kʼisbʼal re Saúl xubʼij che David che kkunik kkʼuleʼ na rukʼ ri umiʼal ubʼiʼ Mical, we kukamsaj 100 filisteos. ¡Chata wariʼ! Ri Saúl are kraj che ri täq filisteos kkekamsaj ri David. Tekʼuriʼ xbʼantaj ta wariʼ, rumal laʼ ri Saúl xuya na ri umiʼal che David rech kkʼuleʼ rukʼ.

Xopan jun qʼij, ri Saúl xubʼij che Jonatán xuqujeʼ chike ri ajupatinel che kraj kukamsaj David. Jonatán xubʼij wariʼ che ri utat: ‹Xaq makamsaj ri David. David ubʼanom ta kʼäx chawe. Xa atutoʼm. Xuya ri ukʼaslemal pa kʼäx chiʼ xukamsaj ri Goliat, chiʼ xawil wariʼ sibʼalaj xatkikotik›.

Saúl xuta ri xubʼij ukʼojol che, xutzujuj che kubʼan ta kʼäx che David. Xkʼam chi lo David rech kupatanej ri Saúl. Tekʼuriʼ pa jun qʼij chiʼ tijan kbʼixon rukʼ ri arpa, Saúl xukʼaq chi jumul ri nim raqan uchʼichʼ che David. David xanmajik, wajun chʼichʼ xtzaq che ri xan. ¡Xubʼan oxibʼ mul che xubʼan wariʼ! ¡David xrilo che rajawaxik kanmajik!

Che wajun aqʼabʼ David xbʼe che rachoch, tekʼuriʼ Saúl xutaq bʼi kʼi täq achijabʼ rech kukamsaj. Mical retaʼm su kraj kubʼan ri utat. Xubʼij wariʼ che David: ‹Jat che wajun aqʼabʼ, we katbʼe ta chweq katkamik›. Kimik ri Mical xutoʼ ri David rech kanmajik, xresaj bʼi pa jun ventana. Xa jubʼiqʼ xraj che wuqubʼ junabʼ che ri David ukʼolom ribʼ rumal ri Saúl, xukʼol ribʼ pa jalajoj täq lugar.