MURI ake i te ta anga a Davida ia Golia, kua apai mai te rangatira vaeau o Iseraela ko Abenera iaia kia Saula. Rekareka tikai a Saula ia Davida. Kua akariro aia ia Davida ei rangatira i roto i tona nuku vaeau e kua apai iaia kia noo ki roto i te are ariki.

Muri mai, te oki mai anga te nuku vaeau mei te tamaki i to Philiseti, kua imene te au vaine e: ‘Kua mate ta Saula au tauatini, kua ngauru ra te tauatini a Davida.’ Kua vareae a Saula no te mea maata atu te akangateitei i orongaia kia Davida i to Saula. Inara kare a Ionatana te tamaiti a Saula i vareae ana. Inangaro tikai aia ia Davida, e kua inangaro katoa a Davida ia Ionatana. I reira kua taputou raua kia raua uaorai e ka vai ua rai raua ei oa.

E tamaiti kite karape a Davida i te akatangi i te kinura, e e reka ana a Saula i tana akatangi imene. I tetai ra kua tupu te vareae kia Saula e kua rave aia i tetai angaanga kino tikai. Ia Davida e akatangi ra i te kinura, kua rave a Saula i tana korare e kua pei i te reira, i te karanga anga e: ‘Ka patia au ia Davida ki runga i te paruru!’ Inara kua kape a Davida, e kare i puta ana i te korare. Muri mai kare akaou te korare a Saula i tano ana ki runga ia Davida. Kua kite i reira a Davida e ka anoanoia aia kia matakite.

Te maara ra ia koe te taputou a Saula? Kua karanga aia e ka oronga aia i tana tamaine ei vaine na te tangata i ta ia Golia. Kua karanga a Saula kia Davida e e apai i tana tamaine ia Mikala ei vaine nana, inara e na mua aia i te ta e 100 enemi Philiseti. E akamanako ua ana ra i tera! Inangaro tikai a Saula kia mate a Davida i te Philiseti. Inara kare aia i mate, e kua oronga i reira a Saula i tana tamaine ei vaine na Davida.

I tetai ra kua akakite a Saula kia Ionatana e tona au tavini pouroa e ka inangaro aia i te ta ia Davida. Inara kua karanga atu a Ionatana ki tona papa e: ‘Auraka koe e takinokino ia Davida. Kare aia i rave ana i tetai apinga tarevake kia koe. Te au mea pouroa tana i rave kua riro ei tauturu maata ia koe. Kua akaatinga aia i tona oraanga i te ta ia Golia, e kua rekareka koe i toou kite anga i te reira.’

Kua akarongo a Saula ki tana tamaiti, e kua taputou e kare aia e takinokino ia Davida. Kua akaokiia mai a Davida, e kua tavini akaou aia ia Saula i roto i tona are mei tana rai i rave i mua ana. Inara i tetai ra, ia Davida e akatangi imene ra, kua pei akaouia e Saula a Davida ki tana korare. Kua kape a Davida, e kua puta te korare ki roto i te paruru. Ko te toru teia o te taime! Teianei kua kite a Davida i reira e ka anoanoia aia kia oro ke!

I taua po ra kua aere a Davida ki tona uaorai kainga. Inara kua tono a Saula i tetai au tangata e ta iaia. Kua kite a Mikala i te parani a tona papa. E kua akakite ki tana tane e: ‘Me kare koe e oro i teia po, ka mate koe apopo.’ Taua po ra kua tauturu a Mikala ia Davida kia oro na roto i te maramarama. E itu o Davida mataiti i te oro aere anga i te pipini i tera ngai e i tera ngai kia kore aia e mou ia Saula.