AKAULO na Daudi aiyar Goliat, koyanga Abiner apolon loka ajore na Isirael ngesi nejai Saul. Kiyalama Saul noi kede Daudi. Kitarau ngesi ekapolon kotoma ajoreke ido koyangau ngesi aiboi togo loka ekabaka.

Akaulo, ebongu ajore kotoma aitiji Ipilisitian, kowoikis angor ebe: ‘aar Saul ikelukumin, ka Daudi da ikelukumin itomon.’ Kitunyurik na Saul noi naarai einakinitai Daudi ayongio adepar Saul. Konye mam Yonatan, okoku loka Saul ikokoteikit. Amina ngesi Daudi noi ido Daudi da emina Yonatan. Kiswamata iarei lu aitutuket na apaikin duc eraasi ipapero.

Arai Daudi araman loajokuna loka adeudeu ido kominakinite Saul airam naka Daudi. Konye apaaran adiopet, kijaik Saul ekokoteke aswam ibore yeni arono. Nepe erami Daudi adeudeu, kolem Saul akekwara, korem, kobala ebe: ‘Aremi Daudi aiminaikin arwatat!’ Konye kigaliikin Daudi, kinac akwara ngesi. Kokau bobo, kodiak Saul airem Daudi kakekwara. Kojenik Daudi do kwana ebe, ebusakinit ngesi acoit noi.

Iitunit ijo aisumunet na ejaikinit Saul? Abala ngesi ebe, einakini akokuke araun aberu naka etunganan lo eyari Goliat. Abu do Saul kolimok Daudi ebe epedori ngesi aimany Mikal, konye ber ebusakinit ngesi aiyar Ipilisitian lukasurup 100. Koomoom ber ngun! Aomit Saul cut ebe eyarete Ipilisitian Daudi. Konye mam apotu, aso koinak do Saul akokuke araun aberu naka Daudi.

Adiopepaaran, kolimok Saul Yonatan ka ikebulesin ebe ekoto ngesi aiyar Daudi. Konye kobala Yonatan papake ebe: ‘siri imusung Daudi. Mam ngesi iswamaikinit ijo idiobore yen erono. Konye nueswama kere erai kanu aingarakinet kon. Abu koinak aijarake ne ayaria Goliat, ido ne ianyuna ijo ngin, abu ijo iyalamikin.’

Abu Saul kopupok okokuke ido kisumun ebe mam imusungi Daudi. Kinyakunai Daudi ido ijaanak Saul kotogoke kwape lem sek. Adiopepaaran, kerami Daudi, koremo bobo Saul akekwara nejai Daudi. Kingalikin Daudi, korem akwara arwatat. Erai na irwan nauniet! Kojenu do Daudi ebe ibusakinit ngesi akerit awai!

Kolot Daudi kakuare kangin togoke. Konye kijuka Saul icetunga aiyar ngesi. Ajeni Mikal nu etemonokinit papake. Aso kolimok okilenike ebe: ‘Arai mam ijo ilosi lolo kuare, moi, iraun ijo etunganan lo atwan.’ Kakuare kangin, kingarak Mikal Daudi aisi kodirisa. Adaun bala ikar ikanyikaare, ebusakinit Daudi angopit anyoun abosit adiopet kiton ace tetere mam Saul edumuni ngesi.