59-нҗы хекая

Давут нәме үчин гачмалы боляр?

ДАВУТ Голяты өлдүренсоң, гошун баштутаны Абнер оны Саулың янына гетирйәр. Саул Давутдан дийсең хошал. Ол Давуды гошун баштутанларының бири эдип беллейәр ве көшкде галдыряр.

Соңра гошун филистилилер билен сөвешден гайдып геленде: «Саул өлдүрди мүңлери, Давут болса — он мүңлери» дийип, аяллар айдым айдярлар. Саул Давуда гөриплик эдйәр, себәби оны өзүнден көп хорматлаярдылар. Эмма Саулың оглы Ёнатан оңа гөриплик этмейәр. Ол Давуды йүрекден говы гөрйәр. Давут хем оны говы гөрйәр. Шонуң үчинем олар бири-бирине хемишелик дост болмага сөз берйәр.

Давут арфаны говы чалярды. Онуң сазы Саула яраярды. Йөне Саул гөриплик эдип, бир сапар өрән ярамаз иш эдйәр. Давут арфа чалып отырка, Саул элине найза алып: «Мен Давуды өлдүрерин!» дийип, оңа зыңяр. Эмма Давут эгилйәр ве найза сова гечйәр. Соң бир гүн Саул ене-де Давуда найза зыңяр, йөне дегмейәр. Шонда Давут сересап болмалыдыгына дүшүнйәр.

Саулың берен сөзи ядыңдамы? Голяты өлдүрен адама гызыны бермелиди. Ахыры Саул Давуда Микал диен гызыны берҗекдигини айдяр. Йөне ол илки 100 саны филистили душманы өлдүрмелиди. Гөз өңүне гетирип бир гөр! Аслыетинде, Саул Давуды филистилилер өлдүрер өйдйәрди. Йөне оны өлдүрип билмейәрлер. Саул болса гызыны Давуда бермели боляр.

Бир гезек Саул Давуды өлдүрҗекдигини Ёнатана ве әхли хызматкәрлерине айдяр. Эмма Ёнатан какасына ялбарып: «Давуда дегме. Ол саңа хич хили эрбетлик этмеди. Гайтам, ол саңа хемише көмек эдйәрди. Голяты өлдүрмек үчин ол җаныны ховп астына салды. Сен муны гөреңде бегендиң» дийди.

Саул оглуны диңләп, Давуда хич хили яманлык этмеҗекдигине сөз берйәр. Давуды ызына гетирйәрлер ве ол өңкүси ялы Саулың өйүнде хызмат эдйәр. Йөне бир гезек Давут саз чалып отырка, Саул оңа ене-де найза зыңяр. Давут совуляр ве найза дивара дегйәр. Бу эййәм үчүнҗи гезекди. Инди Давут гачмалыдыгына дүшүнйәр.

Шол гиҗе Давут өйүне баряр. Эмма Саул оны өлдүрмек үчин, ызындан адам иберйәр. Микал какасының максадыны билйәрди. Шонуң үчинем ол адамсына: «Эгер сен шу гиҗе гачмасаң, эртир өлерсиң» диййәр. Шол гиҗе Микал Давуда әпишгеден чыкып, гачмага көмек эдйәр. Саул тапмаз ялы, Давут еди йыла голай башга ерлерде гизленмели боляр.

1 Патышалар 18:1—30; 19:1—18.