TAIM Devit i kilim i dai Goliat, namba wan ofisa bilong ami bilong Israel, Apner, em i kisim Devit i go long Sol. Sol i amamas tru long Devit. Em i makim Devit i kamap wanpela namba wan ofisa long ami bilong em na kisim Devit i go i stap long haus king.

Bihain, taim ol ami i pait pinis wantaim ol Filistia na i kam bek, ol meri i singsing olsem: ‘Sol i kilim planti tausen man, tasol Devit i kilim planti planti tausen.’ Dispela i mekim Sol i jeles, long wanem, ol i givim biknem moa yet long Devit, winim Sol. Tasol pikinini bilong Sol, em Jonatan, em i no jeles. Em i laikim tru Devit, na Devit tu i laikim tru Jonatan. Olsem na tupela i tok promis olsem tupela bai stap pren oltaim.

Devit i save gut tru long pilaim musik, na Sol i save laikim musik bilong em. Tasol wanpela taim pasin jeles bilong Sol i kirapim em long mekim wanpela samting i nogut tru. Taim Devit i pilaim musik i stap, Sol i kirap tromoi spia long em na tok: ‘Nau bai mi sutim Devit long spia na kilim em i dai!’ Tasol Devit i abrusim spia. Bihain Sol i mekim gen, na Devit i abrusim spia gen. Olsem na nau Devit i save em i mas was gut.

Yu tingim tok promis Sol i bin mekim? Em i bin tok em bai givim pikinini meri bilong em long dispela man i kilim i dai Goliat. Bihain Sol i tokim Devit olsem em i ken kisim pikinini meri bilong em, Mikal, tasol pastaim em i mas kilim i dai 100 Filistia. Man! Tingim dispela samting! Sol i laik tru bai ol Filistia i kilim i dai Devit. Tasol ol i no kilim i dai Devit, olsem na Sol i givim pikinini meri bilong em long Devit.

Bihain Sol i tokim Jonatan na olgeta wokman bilong em olsem em i laik kilim i dai Devit. Tasol Jonatan i tokim papa bilong em: ‘Yu no ken mekim nogut long Devit. Em i no bin mekim wanpela rong long yu. Olgeta samting em i bin mekim i helpim yu. Em i no bin tingim laip bilong em yet taim em i kilim i dai Goliat, na yu bin lukim, na yu bin amamas tru.’

Sol i harim tok bilong pikinini bilong em, na em i tok promis olsem em i no inap mekim nogut long Devit. Devit i kam bek na mekim wok gen long haus bilong Sol olsem em i bin mekim long pastaim. Tasol wanpela taim, Devit i pilaim musik i stap na Sol i tromoim gen spia long em. Devit i abrusim spia na spia i sutim banis. Dispela em i namba tri taim! Nau Devit i save em i mas ranawe!

Long dispela nait, Devit i go long haus bilong em yet. Tasol Sol i salim sampela man i go bilong kilim em i dai. Mikal i save long samting papa bilong em i laik mekim. Olsem na em i tokim man bilong em: ‘Sapos yu no ranawe nau long dispela nait, tumora ol bai kilim yu i dai.’ Long dispela nait, Mikal i helpim Devit long kalap long windo na ranawe. Inap 7-pela yia Devit i hait hait nabaut na bai Sol i no inap painim em.