Maana 60nan

Abigali ni Dawuda

MUSO cɛɲi min bɛ ka na Dawuda kunbɛn, yala i b’a dɔn wa? A tɔgɔ ye ko Abigali. Muso hakilima don. A ye Dawuda bali ka kojugu kɛ. Nka, sani an ka kuma o kan, an k’a lajɛ fɛn min ye Dawuda sɔrɔ.

Dawuda bolilen kɔ Saul ɲɛ, a taara a yɛrɛ dogo kuluwo dɔ la. A balimakɛw ni a ka denbaya tɔw nana a sɔrɔ yen. Cɛ minnu nana Dawuda fɛ, u bɛɛ lajɛlen tun bɛ taa mɔgɔ 400 ɲɔgɔn na. Dawuda kɛra olu kuntigi ye. Dawuda tilala ka taa Moab masakɛ fɛ, k’a fɔ a ye ko: ‘A  to ne fa ni ne ba ka to i fɛ fo ne k’a dɔn min bɛna ne sɔrɔ.’ O kɔfɛ, Dawuda ni a ka cɛw taara u dogo kuluw la.

O de kɔfɛ, Dawuda ni Abigali bɛnna sira la. Abigali furucɛ tun tɔgɔ ye ko Nabal. Nabal tun ye fɛntigi ye. Dugukolo fana tun b’a bolo. Saga 3 000 ani ba 1 000 tun b’a bolo. Nabal tun ka jugu. A muso Abigali tun cɛ ka ɲi kosɛbɛ. A tun bɛ koɲuman kɛcogo dɔn fana. Don dɔ la, a y’a ka denbaya kisi yɛrɛ. O kɛra cogo min na, an k’o lajɛ ɲɔgɔn fɛ.

Dawuda ni a ka mɔgɔw tun ye koɲuman kɛ Nabal ye. U tun ye Nabal ka sagagɛnnaw dɛmɛ walisa ka a ka sagaw lakana. O la sa, don dɔ la, Dawuda ye a ka cɛ dɔw ci Nabal ma walisa Nabal ka ɲɛ u ma ka u dɛmɛ. Dawuda ka cɛw sera Nabal fɛ tuma min na, Nabal ni a dɛmɛbagaw tun bɛ ka sagaw si tigɛ. Ɲɛnajɛdon tun don. Dumunifɛn duman caman tun bɛ Nabal ka so. Dawuda ka cɛw y’a fɔ Nabal ye ko: ‘An ye koɲuman kɛ i ye. An ma i ka saga si sonya, nka an y’i ka mɔgɔw dɛmɛ ka sagaw kɔlɔsi. Sisan sa, i ka ɲɛ an ma ka dumuni dɔ di anw ma.’

Nabal ko: ‘Ne tɛna ne ka dumuni ta ka di aw mɔgɔ suguw ma.’ A ye kuma jugu fɔ u ma, ka kuma juguw fɔ Dawuda fana kama. Dawuda ka cɛw seginna ka na o fɔ Dawuda ye tuma min na, Dawuda diminna kosɛbɛ. A ko a ka cɛw ma: ‘Aw ka aw ka npanw ta!’ U ye u ka npanw ta o yɔrɔnin bɛɛ la, ka sira minɛ walisa ka taa Nabal ni a ka mɔgɔw faga.

Nka, Nabal ka cɛ minnu ye Nabal ka kuma juguw mɛn, olu dɔ la kelen taara o fɔ Abigali ye. O yɔrɔnin bɛɛ la Abigali ye dumunifɛnw labɛn, k’olu da faliw kɔ la, ka sira minɛ. A ni Dawuda bɛnna sira la tuma min na, a jiginna ka bɔ a ka fali kan, ka a biri Dawuda ɲɛkɔrɔ, k’a fɔ a ye ko: ‘Hakɛ to matigi. I kana ne cɛ Nabal ka ko jate. Lagasa don. A bɛ ko kunntanw de kɛ. Nin ye i ka bonya ye. Sɔn a la, i ka yafa an ma.’

Dawuda y’a jaabi ko: ‘I ye muso hakilima ye. I ye ne bali ne ka Nabal faga ani ka ne ta juru sara a la, a ka juguya kosɔn. Taa hɛrɛ la i ka so.’ Nabal salen kɔfɛ, Abigali kɛra Dawuda muso dɔ ye.

1 Samuɛl 22:​1-4; 25:​1-43.