Abahüdaguni 60

Awigaili luma Dawidi

SUBUDITU san nibureintu magadiñetu to ñǘbuinboun arihei Dawidi bun? Awigaili tíribei. Saminatu buidu, aba terederuni Dawidi luéi ladügün aba katei wuribati. Ani lubaragiñe warihini ka lan tadügübei, warihali káñaha lan asuseredubei lun Dawidi.

Lárigiñe lanurahan Dawidi luéi Saulu, aba laramudagun lagadábugiñe dübü. Aba hayabin líbirigu hama liduheñu ñeinhin lubéi. Ñübuintiñu kei burí 400 wügüriña lumoun, aba ligíaali lan hábuti. Ábati lidin Dawidi lumoun lurúeite Moabü aba lariñagun: ‘Adügabá aban fulesei nun, redeilá núguchi tuma núguchu buma darí narihini kaba lan asusereda nun.’ Lárigiñe, aba lagumeserun Dawidi hama luwügüriña aramudagua áraabu.

Dan lárigiñe, aba lasubudirunu Dawidi Awigaili. Nawali líribei tani weiriei, aba wügüri rísiti ani gíbeti lufulasun. Añahein 3.000 mudún luma hama 1.000 gábara. Furundeti Nawali. Ánhounti Awigaili to lani weiriou magadiñetu. Subuditi giñe ladügǘn katei le úaraguabei tun. Aban weyu sefu tumutiña tiduheñu. Warihali ida liña lan.

Dawidi hama luwügüriña areidatiñu lun Nawali. Ídehatiñu lidan hounigirún lilügüniña mudún. Aban weyu, aba lóunahaniñu Dawidi luwügüriña amuriaha aban fulesei luma Nawali. Aba hachülürün dan le anihán lan Nawali hama lubueingu ásaraña lilügüniña mudún. Luéyuri fedu weyu ligía, ani gíbeti éigini buiti luma Nawali. Ábati hariñagun luwügüriña Dawidi lun: ‘Buiti wóuserunibu. Miweruhantiwa ni aban mudún buéi, ani íderagua wamutibu óunigiraña. Adügabei fulesei woun, ruba murusun éigini woun.’

Aba lariñagun Nawali: ‘Michubadiwa éigini houn wügüriña kei huguya.’ Lau wuribani layanuha, ani ariñagati katei wuribati luagu Dawidi. Dan le hariñaguni wügüriña ha katei le lun Dawidi, aba lagañidun saragu. Aba lariñagun houn: ‘Ragǘ humoun hefeinte!’ Aba háfuridun lun háfaruni Nawali hama luwügüriña.

Aganba lumuti aban hádangiñe luwügüriña Nawali luriban lererun, aba lariñaguni tun Awigaili le asuseredubei. Furesegueina aba taranserun Awigaili éigini, aba tíchuguni hanaganwagu fiú burigü aba tidin. Dan le tadunragun luma Dawidi, aba tareirun luéi burigü, aba tabuluchagun tariñaga: ‘Adügabá fulesei nun, madügabá gasu lau Nawali le nani weiriei. Ibidiouguati lau, ani adügati bandi libidiounigan aau. Nihán aban idewesei. Resibibei lau fulesei, ani ferudunabawa luagu le asuseredubei.’

‘Chuti bau,’ liña lóunabun Dawidi. ‘Rédeibaadina luéi náfaruni Nawali ladüga luriban lusan. Giribubá búbiñoun lau darangilaü guentó.’ Lárigiñe lounwen Nawali, aba Awigaili lan aban hádangiñe lánigu Dawidi weiriou.

1 Samueli 22:1-4; 25:1-43.