DAVID ton awk i a ra lengmang mi aa dawh ngai mi nu hi nan hngal maw? A min cu Abigail a si. Amah cu a fim i, thil ṭhalo tuah lo awk ah David kha a thlauh. Sihmanhsehlaw cu kong kan chim hlan ah David cu zeitindah a rak si zoh hmanh u sih.

David cu Saul sin in a zam hnu ah, lungkua pakhat chung ah aa thup. A ule pawl le a dang an chungkhat mi hna cu amah he cuka ah cun an um ve. An zapi in minung 400 hrawng amah sin ah an ra i, David cu an hruaitu a si. Cu hnu ah David cu Moab siangphrang sin ah a kal i, ‘Ka cung ah zei thil dah a tlung lai ti ka hngalh hlan cu zangfahnak in ka pa le ka nu hi nangmah sin ah umter ko hna,’ tiah a ti. Cu hnu ah David le a mi hna cu tlang cung ah an i thup.

Mah hnu ahcun David nih Abigail hi a ton mi a si. Abigail a vapa Nabal cu vawlei a ngeitu mirum ngai pakhat a si. Tuu 3,000 le meheh 1,000 a ngeih. Nabal cu mi ṭhalo a si. Sihmanhsehlaw a nupi Abigail cu aa dawh ngaingai. Culeng ah a hmaan mi kha zeitindah tuah awk a si ti zong a hngalh fawn. Voikhat cu a innchung khar hmanh kha a rak khamh hna. Zeitindah a rak khamh hna ti zoh hmanh u sih.

David le a mi hna cu Nabal cung ah zangfahnak an rak ngei. A tuu kha run awk ah an rak bawmh tawn. Cucaah nikhat cu David nih a mi cheukhat kha Nabal sin ah bawmhnak hal awk ah a thlah hna. Nabal le a mi hna tuu hmul an rak meh lio ah David a mi hna cu an sin ah an vung phan. Mah ni cu puai ni a si i, Nabal cu ei awk thil ṭha tampi a ngei. Cucaah David a mi hna nih: ‘Kannih cu na cung ah ṭhatnak kan tuah cang. Na tuu pakhat hmanh kan fir lo, sihmanhsehlaw ṭha tein kan in zohkhenhpiak. Cucaah atu cu zangfahnak in kannih kha ei awk tlawmpal in kan pe ko,’ tiah an ti.

Nabal nih: ‘Nanmah bantuk mi hna cu zeihmanh kan pe kho hna lo,’ a ti hna. Zei rel lo in bia kha a chim i, David a ṭhatlonak kong zong a chim ve. Mi hna cu an kir i, mah kong cu David kha an chimh tik ah, David cu a thin a hung ngaingai. ‘Nan vianam kha i bei dih u,’ tiah a mi kha a chimh hna. Cun Nabal le a mi hna kha thah awk ah an tho.

Nabal a bia ṭhalo kha a thei mi Nabal a mi pakhat nih zeidah a cang ti mi kha Abigail cu a chimh. A theih cangka in Abigail nih rawl cheu khat kha a timh hna. Laa cung ah a chuan hna i a kal colh. David kha a ton tik ah, a laa cung cun a ṭum i, David hmai ahcun a kun i, hitin a chim. ‘ Ka bawipa, zangfahnak in ka vapa Nabal a bia cu zei ah rel hin hlah. Amah cu mihrut a si ko i, hruhnak thil lawng hi a tuah tawn mi a si ko. Kahin laksawng kaa hun i ken hna. Zangfahnak in i lak hna law a cang cia mi thil kong ah kan ngaithiam ko u.’

David nih: ‘Nangmah cu a fim ngaingai mi nu pakhat na si. Nabal a ṭhatlonak phuhlam awk ah amah ka thah hnga mi kha thah lo awk ah na ka khamh cang. Daite in inn ah va kir ko,’ tiah a ti. A hnu ah Nabal a thih tik ah, Abigail cu David a nupi pakhat ah a cang.