WE OME yeerdagleged, David sega daniggidi, ¿be wisi doawa? We ome nuga Abigaíl. We ome yeer binsaed nigga, ibagwengi imasgusa David mer ibmar isgana imaggega. Auggine we ibmar dagged iduale, bin anmar daggoloe igi David gudigusa.

Saúlgi waggidsad sorbali, David aggwa ollormalad yaba duggudi gusad. E iamala geb bela e gwenadgan David sega nonigusmalad. Masserganbi, 400 mergusaar David sega nonimalad, geb David wemar dummadga gunonisunnad. Degiidgi, David, Moab neggwebur reyse nade gusad, geb David ega soge: ‘Wis an bab an nan bogwa bemar waliggi meged an abegwele. An bin daggolo igi andi an gudodibe’. Sorba David geb e sordaganmar sabburba duggudi gudmalad.

Beedse gine, David Abigaíl magdagge gunoniggid. We ome, e sui nuga Nabal. Nabal, dule mani ibedid, nagnumar buggidar niggad. Ovejamarbi 3.000 mergu niggad geb cabramar 1.000 mergu nigbalid. Auggine, Nabal dule nallegala gued. E ome Abigaíldi ome nuegwad dagleged. Uggine dule nued dabalid. Ibagwengi na gwenadgan bendas gusa. Anmar daggoena igi we ibmar gusa.

David, geb e sordaganmar nued Nabalgi gusmalad. Nabalga oveja aggwemalad bendas gusmala mer ei addursalemalaga. Ibagwengi David na sordamar barmisa Nabalse wis ibmar egisega. Web modabmargua, daggargu, Nabal geb ega arbamalad buraggwa oveja absar eninanaid. Iba onolenai, degsoggu Nabal buggidar mas nuegan dagsii. Degiidgi, David sordamar ega sogdemala: ‘Anmardi be bogwa dule nued gusmalad. Bei oveja wargwensaale anmar addursassulid, bur anmardi bega aggwisad. Degsoggu, be wis anmarga mas ugged anmar abegena’.

Nabal ogwissiali geb soge: ‘Dulemar begimaladga an mas uggosuli’. Saeiddo sunmagge, geb David siggi ibmar nuegan gwen sogsasulid. Davidga sognonimargua deyob Nabal sogye, David belabela saeiddoged. E sordamarga soge: ‘¡Espadamar nasigmalo!’. Geb nadmarsunna Nabal oburgwega geb e sordagan oburgwebaliga.

Nabal e sorda wargwendi iddoargua Nabal gwen gaya nabirid sunmassuli, Abigaílga sognade igi ibmar gusa. Abigaíl yog mas guaggwa imaggar imasa, asnomar birgi nasignasig imasa geb degi nade. David abin gunonigua, Abigaíl asnogi agdes imasa, geb David abinni dullu imasa geb degine soge: ‘Mer be an sui Nabaldi iddoge. Ar wedi dule binsaed saddedid, degine, yogasaar ibmar imagged. An bega ibmar sedaniggid. Mer be an abin obanen gadina, geb ibmar gusadi iessao’.

David abinsoge: ‘Be yeer binsaed niggad. Nabal sabsur daedbali mer an Nabal oburgwega be an bargasad. Be negse be na gannar nuedgi nao’. Sorbali, Nabal burgwisgua, David, Abigaíl niggunonibalid.