¿PIʼRAAJÜIN tü wayuu antakat nünainmüin David? Abigail sünülia. Kekiisü maʼin shia, nnojoishi aainjüin kasa mojusü David sutuma. Süpülapünaa waashajaain süchiki tia wekirajaa süchiki tü alatakat nümüin David.

Ounjulaashi David suluʼu wanee koʼushii süchikijee nuʼluwataain. Antüsü nüpüshi nünainmüin otta 400 tooloyuu, nekiipuʼuka naya. Nuʼunaka David eemüin chi aluwataashikai Moab, nümaka: ‹Puuʼulaa yaaiwa chi tashikai otta tü teikat pümaa tatüjaʼaleepa saaʼu tü alatajatkat tamüin›. Süchikijee tia ounjulaashi David otta na nümaajanakana wünaʼapü.

Mapa niʼraajaka David Abigail. Mojulaashi Nabal chi suʼwayuusekai, washirü nia, eesü nümaʼana 3.000 anneerü, 1.000 kaaʼula otta miyoʼu nuumain. Anasüchon maʼin Abigail otta aainjüsü kasa anasü. Katüsü soʼu süpüshi sutuma, wekirajaa sünain tü saainjakat.

Anamia David otta na nümaajanakana nümüin Nabal. Naaʼinmajüin naʼanneetse. Soʼu wanee kaʼi nuluwataain David wanee wayuuinnua eemüin Nabal süpüla nükaaliinjüin naya, nantaka wanaa sümaa nüüjüin soi anneerü namaa na nümaajanakana, aainjüshii miʼiraa soʼu tia, wainma eküülü nümaʼana. Namaka na wayuukana: ‹Anamia waya pümüin, nnojotsü waʼluwajüin paʼanneetse, waaʼinmajüin shia. Püsülaja wamüin eküülü›.

Nümaka Nabal: ‹Nnojoishi asülajüinjachin taya eküülü jümüin›. Jashichishi maʼin nia, mojusü nünüiki nüchiki David. Süküjünapa tia nümüin David, jashichika maʼin nia, nümaka namüin na wayuukana: ‹¡Jaapaa jüchajaruutse!› Noʼunaka süpüla noʼutuin naaʼin Nabal otta na nümaajanakana.

Aküjünüsü nünüiki Nabal sümüin Abigail, sünaajaka eküülü, suʼunaka saaʼu süpüliise. Süntiraapa nümaa David süshakataka, sümaka: ‹Laülaashikalee, nnojo kanain paaʼin nünüiki Nabal chi taʼwayuusekai, aainjüshi neʼe kasa mojusü. Anuu wanee tasülajala, paapaa otta pülatira sooʼopünaa paaʼin tü aainjünakat pümüin›.

Nümaka David: ‹Kekiisü maʼin pia, nnojoleechi toʼutuin aaʼin Nabal, püleʼejaa pipialuʼumüin sümaa jimatüin paaʼin›. Ouktapa Nabal nuʼwayuusesü David Abigail.