Abigaili po Davidi Po
OTÀN 60
Abigaili po Davidi Po
BE HIẸ yọ́n yọnnu whanpẹnọ he ja nado wá pé Davidi ya? Abigaili wẹ e nọ yin. E yin lẹnpọn dagbenọ, bo hẹnalọdotena Davidi ma nado wà nuylankan. Ṣigba, whẹpo mí na plọnnu gando nujijọ enẹ go, gbọ mí ni pọ́n nuhe to jijọ do Davidi go.
To whenue Davidi họ̀n sọn Sauli dè godo, e yì whlá ede do aigbaslo de mẹ. Nọvisunnu etọn lẹ po hagbẹ whẹndo tọn etọn he pò lẹ po yì gọna ẹn to finẹ. Diblayi sunnu 400 wẹ wá e dè podọ Davidi lẹzun nukọntọ yetọn. Davidi sọ yì ahọlu Moabi tọn dè bo dọmọ: ‘Jaale, dike otọ́ ṣie po onọ̀ ṣie po ni nọ dè we kakajẹ whenue yẹn na yọ́n nuhe na jọ do go e.’ Enẹgodo, Davidi po sunnu etọn lẹ po jẹ yede whlá ji do osó pẹvi pẹvi lẹ mẹ.
To ehe godo wẹ Davidi wá pé Abigaili. Asu etọn Nabali yin adọkunnọ de he tindo aigba susu. E tindo lẹngbọ 3000 po gbọgbọẹ 1000 po. Gbẹtọ fifiẹtọ de wẹ Nabali yin. Ṣigba asi etọn Abigaili yọnwhanpẹ taun. E sọ yọ́n lehe yè nọ wà nuhe sọgbe do. E tlẹ whlẹn whẹndo etọn gán to ojlẹ de mẹ. Gbọ mí ni pọ́n lehe e wàmọ do.
Davidi po omẹ etọn lẹ po ko do homẹdagbe hia Nabali. Yé ko gọalọ nado basi hihọ́na lẹngbọ etọn lẹ. Enẹwutu to gbèdopo, Davidi do sunnu etọn delẹ hlan Nabali dè nado dín nukundagbe etọn. Omẹ Davidi tọn lẹ wá Nabali dè to whenue ewọ po alọgọtọ etọn lẹ po to ofún lẹngbọ lẹ tọn pà. Azán hùnwhẹ tọn de wẹ, bọ Nabali tindo núdùdù dagbe susu. Nuhe omẹ Davidi tọn lẹ dọ die: ‘Míwlẹ ko do homẹdagbe hia we. Mí ma fìn depope to lẹngbọ towe lẹ mẹ, kakatimọ, mí ko gọalọ nado penukundo yé go. Enẹwutu, jaale bo na mí núdùdù pẹẹde.’
Nabali sọ dọmọ: ‘Yẹn ma na na núdùdù ṣie gbẹtọ taidi mìwlẹ gba.’ E dọhona yé po hùnyinylan po, bosọ dọ nuylankan lẹ do Davidi go. To whenuena sunnu lọ lẹ lẹkọ bo dọ nuhe jọ lọ na Davidi, homẹgble e taun. E dọna sunnu etọn lẹ dọmọ: ‘Mì blá ohí mìtọn lẹ dogo.’ Yé sọ dedo nado yì hù Nabali po sunnu etọn lẹ po.
Dopo to sunnu Nabali tọn lẹ mẹ he sè ohó ylankan he Nabali dọ lẹ, yì dọ nuhe jọ lọ na Abigaili. To afọdopolọji, Abigaili wleawuna núdùdù delẹ. E bẹ yé do kẹtẹkẹtẹ lẹ ji bo dedo. Whenuena e pé Davidi, e jẹte sọn kẹtẹkẹtẹ etọn ji bo litai, bosọ dọmọ: ‘Jaale, mẹdaho, ma dotó asu ṣie Nabali blo. Nulunọ de wẹ ewọ, podọ e sọ nọ wà nulunu lẹ. Nunina de die. Jaale kẹalọyi i bosọ jo nuṣiwa mítọn na mí.’
Davidi sọ gblọn dọmọ: ‘Yọnnu nuyọnẹntọ de wẹ a yin. Hiẹ wẹ zọ́n bọ yẹn ma do hù Nabali nado suahọ ẹ na kanyinylan etọn. Todin, yì whégbè to jijọho mẹ.’ To okú Nabali tọn godo, Abigaili wá lẹzun dopo to asi Davidi tọn lẹ mẹ.
A Gán Sọ Pọ́n Hosọ Ehelẹ
HODO APAJLẸ YISE YETỌN TỌN
Abigaili Yinuwa po Wuntuntun Po
Etẹwẹ mí sọgan plọn sọn alọwle he tindo nuhahun Abigaili tọn mẹ?
