DAVIDA hedavari henia totona ia mai hahine hairaina ena ladana oi diba, a? Ena ladana be Abigaila. Ia be mai ena aonega bona ia ese Davida ia koua ia kerere lasi totona. To unai sivarai ita do dibaia lasi neganai, Davida dekenai ia vara gaudia mani ita itaia.

Davida be Saulo amo ia heau murinai, kohua lalonai ia hunia. Ena tadikaka bona ena ruma bese danu unuseniai idia noho. Tatau 400 bamona be ia dekenai idia mai, bona Davida be edia hakaua tauna ai ia lao. Bena Davida be Moaba ena king dekenai ia lao bona ia noia: ‘Mani egu tamana bona sinana be oi dekenai idia noho ela bona lau diba dahaka do ia vara.’ Gabeai Davida bona ena tatau be ororo gabudia dekenai idia hunia noho.

Unai murinai Davida be Abigaila ia hedavari henia. Ena tau, Nabala, be taga bada tano biaguna ta. Ena mamoe be 3,000 bona ena nanigosi be 1,000. Nabala be hebogahisi lasi tauna. To ena adavana Abigaila be hairai momokani. Danu, kara maoromaoro dalana ia diba. Nega ta ena ruma bese ia hamauria. Ia hamauria dalana mani ita itaia.

Davida bona ena tatau be Nabala dekenai idia hebogahisi. Ena mamoe naria gaukarana idia durua. Unai dainai dina ta Davida ese tatau haida ia siaia Nabala dekenai idia noinoi totona. Idia mai neganai, Nabala bona ena durua taudia be mamoe edia huina idia utua noho. Unai be aria dinana bona Nabala ena aniani namodia be momo. Unai dainai Davida ena tatau ese idia noia: ‘Ai be oi dekenai ai hebogahisi. Emu mamoe ta ai henaoa lasi, to idia ai naria. Mani ai dekenai aniani haida oi henia.’

Nabala ia gwau, ‘Umui bamona taudia dekenai egu aniani do lau henia lasi.’ Mai dagedage danu ia hereva bona Davida ia gwauraia dika. Tatau idia giroa bona Davida idia hamaoroa neganai, ia badu momokani. Ena tatau ia hamaoroa: ‘Emu tuari kaia umui abia!’ Bona dala dekenai idia raka lao Nabala bona ena tatau alaia mase totona.

Nabala ena tau ta be ena hereva dikadia ia kamonai bona Abigaila ia hadibaia. Maoromaoro Abigaila ese aniani haida ia hegaegaelaia. Doniki haida latanai ia atodia bona ia lao. Davida ia hedavari henia neganai, ena doniki amo ia diho, ia tui diho bona ia gwau: ‘Mani emu kara, egu lohia, egu tau Nabala ena hereva oi laloa lasi. Ia be kavakava tauna, bona kavakava karadia ia karaia. Inai harihari gauna mani oi abia, bona emai dika oi laloaboio.’

Davida ia gwau, ‘Oi be aonega hahinena. Oi dainai Nabala lau alaia lasi, ena dika davana henia totona. Emu ruma dekenai oi giroa, mai maino danu.’ Gabeai, Nabala ia mase neganai, Abigaila be Davida ena adavana ta ai ia lao.