Abigayil akk-d Dawed
TAQSIṬ TIS 60
Abigayil akk-d Dawed
TEẒRIḌ anta-ţ tmeṭṭut-agi icebḥen, i d-yemmugren Dawed? Isem-is Abigayil. Teččuṛ d lefhama. Lukan ur teḥbis ara afus n Dawed tili yexdem tawaɣit. Lameɛna uqbel a nwali tamsalt-agi, a nwali acu yeḍran d Dawed.
Mi gerwel ɣef Cawul, Dawed iṛuḥ yeffer deg yiwen lɣar. Atmaten-is d wat wexxam-is meṛṛa ṣubben ɣur-es. Usan-d ɣur-es azal n 400 n yergazen iɣef yuɣal d aneḥkam. Syenna Dawed iṛuḥ ɣer ugellid n Muwab, yenna-yas: ‘Di leɛnaya-k m’ur teǧǧiḍ baba d yemma ad qqimen ɣur-wen alamma walaɣ acu ara yeḍrun yid-i.’ Mbeɛd Dawed d yergazen yeddan yid-es ffren di tɣaltin.
Mi gɛedda wannect-a, Dawed immuger-ed Abigayil. Argaz-is Nabal d ameṛkanti, yekseb 3000 n wakraren d 1000 n tɣeṭṭen. Nabal d yir argaz, lameɛna tameṭṭut-is Abigayil tecbeḥ aṭas yerna tesɛa leɛqel. Yiwen wass tsellek at wexxam-is. Tebɣiḍ aţ-ţeẓreḍ amek?
Dawed d iqeddacen-is xedmen leḥsan i Nabal. Ḥurben ɣef wulli-s. Yiwen wass ihi, Dawed iceggeɛ ɣer Nabal akken a s-issuter lemzeyya. Iqeddacen n Dawed leḥqen di lawan ideg Nabal d imeksawen-is ţellsen ulli. Ass-nni d ass n lfuṛuḥ. Nabal yesɛa aṭas n lerẓaq i wučči. Dɣa iqeddacen n Dawed nnan-as: ‘Nexdem-ak lxiṛ. Ur nukir ula d yiwen n yixef si tqeḍɛit-ik, lameɛna nḥunn ɣef wulli-k. Tura ihi, di leɛnaya-k m’ur a ɣ-tefkiḍ ciṭuḥ n lqut.’
Nabal yerra-yasen: ‘Ur ţţakeɣ ara lqut i lɛibad i kkun-icban.’ Nabal yebda yekkat di Dawed. Iqeddacen n Dawed bernen ɣur-es, ḥkan-as ayen yeḍran. Dawed yerfa ayendin, dɣa yumeṛ i iqeddacen-is: ‘Mkul yiwen a d-yeddem ssif-ines!’ Imiren ṭṭfen abrid akken ad nɣen Nabal d wid yeddan yid-es.
Yiwen seg iqeddacen n Nabal yesla i yir lehduṛ-is, dɣa iṛuḥ ad ixebbeṛ Abigayil ɣef wayen yeḍran. Abigayil tɣawel tessewjed-ed lmakla. Mbeɛd tɛebba-ţ ɣef yeɣyal, teṭṭef abrid. Mi temmuger Dawed, tṣubb-ed seg weɣyul-is, teɣli ɣef wudem zdat n Dawed, tenna-yas: ‘Di leɛnaya-k a sidi, ur ţţak ara awal i wergaz-iw Nabal. Yejhel yerna ixeddem ḥaca tixessaṛin. Aţah tikci. Di leɛnaya n Ṛebbi m’ur ţ-teqbileḍ yerna m’ur a ɣ-tsemmḥeḍ ɣef wayen yeḍran.’
Dawed yerra-yas: ‘Ţ-ţameṭṭut tukyist i telliḍ. Tḥebseḍ-iyi ur nɣiɣ ara Nabal akken a d-rreɣ ţţaṛ ɣef cceṛ i yi-ixdem. Ṛuḥ s axxam-im di lehna.’ Ɣer zdat mi gemmut Nabal, Abigayil tuɣal d yiwet si tlawin n Dawed.
