ANI li ixqaʼal yook chaq chi chalk chiru laj David? Aʼan li xʼAbigail. Li xʼAbigail wank xnaʼlebʼ, joʼkan naq inkʼaʼ kixkanabʼ naq laj David tmaakobʼq. Xbʼeenwa qilaq kʼaru yook xkʼulbʼal laj David.

Laj David kixmuq ribʼ saʼ jun ochoch pek naq kiʼelelik chiru laj Saul. Ebʼ li xkomon laj David keʼwulak rikʼin. Naq keʼxchʼutubʼ ribʼ 400 tana chi winq, laj David kikanaak chi jolomink saʼ xbʼeenebʼ. Tojaʼ naq laj David kiwulak rikʼin li awabʼej re Moab ut kixye re: ‹Xinchalk xpatzʼbʼal usilal chaawu re naq tkanaaq linnaʼ linyuwaʼ aawikʼin toj naq tinsutqʼiiq chaq›. Chirix chik aʼan, laj David ut ebʼ li winq keʼxmuq ribʼ saʼ pim.

Moqon chik laj David kixnaw ru li xʼAbigail. Aj Nabal xkʼabʼaʼ li xbʼeelom li xʼAbigail. Laj Nabal wank naabʼal xchʼochʼ, wank 3.000 xkarneer ut 1.000 xchibʼaat. Laj Nabal maaʼus xnaʼlebʼ. Abʼan li xʼAbigail chʼinaʼus naʼilok ut wank xnaʼlebʼ. Saʼ jun kutan li xʼAbigail kixkol li xjunkabʼal. Qilaq chanru kixbʼaanu aʼin.

Laj David ut ebʼ laj kʼanjel chiru chaabʼilebʼ rikʼin laj Nabal. Joʼkan naq keʼxtenqʼa chi xkʼaakʼalenkil ebʼ li xkarneer. Saʼ jun kutan laj David kixtaqlahebʼ li winq chi xpatzʼbʼal jun li usilal chiru laj Nabal. Laj Nabal ut li ebʼ li xmoos yookebʼ chi bʼesok rix karneer. Saʼ rochoch laj Nabal yook li ninqʼe ut wank naabʼal li chaabʼil xtzakahemq. Naq ebʼ li winq keʼwulak rikʼin laj Nabal keʼxye re: ‹Xoochalk xtzʼaamankil jun usilal chaawu, xbʼaan naq chaabʼilo aawikʼin. Xatqatenqʼa chi rilbʼalebʼ laakarneer ut maajunwa xqakʼam junaq rehebʼ laakarneer. Joʼkan naq, bʼaanu usilal kʼe qatzakahemq!›

Laj Nabal kiʼok xyeebʼal li yiibʼru aj aatin chirix laj David. Tojaʼ naq kixye rehebʼ li winq: ‹Inkʼaʼ tinkʼe eetzakahemq›. Naq laj David kirabʼi aʼin, kichalk xjosqʼil, joʼkan naq kixye rehebʼ li winq: ‹Chapomaq chaq leechʼiichʼ›. Laj David ut ebʼ li winq kohebʼ chi xkamsinkil laj Nabal ut ebʼ li xmoos.

Jun rehebʼ li xmoos laj Nabal kixye chaq re li xʼAbigail li kixbʼaanu laj Nabal. Joʼkan naq li xʼAbigail kixyiibʼ saʼ junpaat li tzakahemq ut kixkʼam saʼ xbʼeenebʼ li bʼuur. Naq li xʼAbigail kixtaw saʼ bʼe laj David kikubʼeek, kixwiqʼibʼ ribʼ chiru ut kixye re: ‹Bʼaanu usilal! Maakʼe saʼ aachʼool li kixbʼaanu aawe linbʼeelom. Maakʼaʼ xnaʼlebʼ, joʼkan naq inkʼaʼ naxkʼoxla chiʼus kʼaru naxbʼaanu. Xinkʼam chaq li tzakahemq, kʼul bʼaanu usilal! Ut chaakuy qamaak›.

Laj David kixye re li xʼAbigail: ‹Wank aanaʼlebʼ, xaabʼaanu naq inkʼaʼ tinkamsi laj Nabal xbʼaan naq kimaakobʼk chiwu. Anaqwan tuqubʼ aachʼool ut ayu saʼ laawochoch›. Naq kikamk laj Nabal li xʼAbigail kiwank ajwiʼ choʼq rixaqil laj David.