BENO zaba nkento yai ya kitoko ya kekwisa na ntwala ya David? Zina na yandi Abigail. Yandi kele nkento mosi ya mayele mpi yandi buyisaka David na kusala mambu ya mbi. Kansi beto tala ntete mambu yina kubwilaka David.

David tinaka Saül mpi kwendaka kubumbana na kati ya ditadi. Kuna dibuta na yandi ti bantu kiteso ya 400 landaka yandi mpi yandi kumaka mfumu na bau. Na nima, David kwendaka na ntotila ya Moab mpi tubilaka yandi nde: ‘Kana nge zola, tata na mono na mama na mono kubikala awa tii kuna mona tazaba nki mambu tabwila mono.’ Na nima dyaka, David na bantu na yandi bumbanaka na ngumba.

Yau kele na nima ya mambu yina David kutanaka na Abigail, nkento ya Nabal; muntu mosi ya mvwama yina vandaka na mameme 3 000, bankombo 1 000. Nabal vandaka muntu ya makasi, kansi nkento na yandi, yina vandaka kitoko, vandaka nkento ya mayele. Kilumbu mosi, yandi gulusaka bantu na yandi.

David na bantu na yandi kusalaka mambu ya mbote sambu na Nabal. Bo taninaka mameme na yandi. Kansi kilumbu mosi, David kutindaka bantu na Nabal sambu na kulomba bima ya kudya. Bantu yina kumaka kilumbu ya mvwama yina yambaka bantu ya kuzenga mika ya mameme. Yau vandaka kilumbu ya nkinsi sambu na Nabal mpi yandi lambaka madya mingi. Bantu ya David tubilaka yandi nde: ‘Beto mevanda bantu ya mbote sambu na nge. Beto meyiba ata kitwisi mosi ve; kansi beto metala yau mbote kibeni. Yau yina, pesa beto bima ya kudya.’

Nabal yantikaka na kufinga David mpi tubaka nde: ‘Mono tapesa ata kima mosi ve na bantu bonso beno.’ Ntangu bau vutukaka, bau mpi songaka David mambu yina, David kuwaka makasi mpi kwendaka na bantu na yandi sambu na kufwa Nabal na bantu na yandi.

Kansi muntu mosi ya Nabal yina kumonaka buzoba ya mfumu na yandi, zabisaka Abigail. Abigail bakaka nswalu bima, tulaka yau na zulu ya bampunda-buluku mpi kwendaka sambu na kukutana na David. Ntangu yandi monaka David, yandi kulumukaka na mpunda-buluku mpi yandi fukamaka na ntwala ya David mpi tubaka nde: ‘Bika nde mfumu na mono kulanda ve mambu ya bakala na mono. Yandi kele zoba mpi kesalaka kaka mambu ya buzoba. Tala dikabu. Mono kebondilaka nge, ndima yau mpi lolula beto sambu na mambu yina mebwa.’

David vutulaka nde: ‘Nge kele na mayele mingi. Nge mebuyisa mono na kufwa Nabal mpi na kuvutula mambi na yandi. Kwenda na ngemba na nzo na nge.’ Na nima, ntangu Nabal kufwaka, Abigail kumaka mosi na bankento ya David.