NĨŨĨ mũtumia ũyũ mũthaka ũroka gũtũnga Daudi? Etagwo Abigaili. Nĩ mũtumia mũũgĩ mũno, nĩagirĩrĩirie Daudi gwĩka ngero njũru. Tũtanamba kwĩruta ũhoro ũyũ-rĩ, reke tuone ũrĩa gwekĩkire kũrĩ Daudi.

Thutha wa Daudi kũũrĩra Saulu, aathire akĩĩhitha ngurunga-inĩ. Ariũ a nyina na andũ acio angĩ a famĩlĩ yao magĩthiĩ gũikara nake kuo. Ta andũ 400 magĩũka kũrĩ we, na Daudi agĩtuĩka mũtongoria wao. Daudi agĩthiĩ kũrĩ mũthamaki wa Moabi akĩmwĩra atĩrĩ: ‘Tareka baba na maitũ moime kũrĩa matũire rĩu, moke matũranie nawe, o nginya rĩrĩa ngamenya ũrĩa Ngai ekũnjĩka.’ Thutha-inĩ Daudi na andũ ake makĩambĩrĩria kwĩhitha irĩma-inĩ.

Thutha ũcio nĩrĩo Daudi aatũnganire na Abigaili. Mũthuriwe Nabali aarĩ gĩtonga kĩnene. Aarĩ na ng’ondu 3,000 na mbũri 1,000. Nabali aarĩ mũndũ mwĩĩ. No ĩndĩ mũtumia wake aarĩ mũthaka mũno. Ningĩ, mũtumia ũcio nĩ oĩ ũrĩa kwagĩrĩirwo nĩ gwĩka wega. Ihinda rĩmwe nĩahonokirie famĩlĩ yake. Reke tuone eekire atĩa.

Daudi na andũ ake nĩ maakoretwo marĩ atugi mũno he Nabali. Nĩ maateithĩrĩirie kũgitĩra ng’ondu ciake. Na rĩu mũthenya ũmwe-rĩ, Daudi agĩtũma amwe a andũ ake makorie ũteithio he Nabali. Anake a Daudi magĩthiĩ kũrĩ Nabali, magĩkora we hamwe na andũ ake no hĩndĩ maramura ng’ondu guoya. Nĩ mũthenya wa iruga, na rĩu Nabali arĩ na indo nyingi njega cia kũrĩa. Ũũ nĩguo anake a Daudi moigire: ‘Tũ koretwo tũrĩ atugi harĩ we. Tũtirĩ twaiya ng’ondu o na ĩmwe yaku, na nĩ tũteithĩrĩirie kũrĩithia. Rĩu wenda gĩtũhe irio.’

‘Hĩ! Ndikũheana irio ciakwa kũrĩ andũ ta inyuĩ,’ ũguo nĩguo Nabali aoigire. Akĩaria na njĩra ya wĩĩ mũno, na akĩgweta maũndũ moru igũrũ rĩa Daudi. Rĩrĩa aanake macokire makĩĩra Daudi ũhoro ũcio-rĩ, Daudi nĩ aarakarire mũno. Rĩu akĩĩra andũ ake atĩrĩ, ‘Wĩyohei hiũ cianyu cia njora!’ Nao makĩoya rũgendo rũa gũthiĩ kũraga Nabali na andũ ake.

Ũmwe wa aanake a Nabali, ũrĩa wamuigwire akĩaria ciugo cia wĩĩ, akĩĩra Abigaili ũrĩa gwekĩkĩte. O ro rĩmwe Abigaili akĩharĩria irio. Acigĩrĩire ndigiri-inĩ akĩambĩrĩria rũgendo. Rĩrĩa magomanire na Daudi, akiuma ndigiri yake, akĩinamĩrĩra thĩ akiuga atĩrĩ: ‘Ta tiga kũrũmbũria ndeto cia mũthuri wakwa Nabali. Nĩ mũkĩgu na ekaga maũndũ ma ũkĩgu. Gĩkĩ nĩ kĩheo. Wenda amũkĩra, na ũtuohere nĩũndũ wa ũrĩa gũtuĩkĩte.’

Daudi aamũcokeirie akĩmwĩra atĩrĩ, ‘Wee ũrĩ mũtumia mũũgĩ. Wee nĩ wagirĩrĩria njũrage Nabali ndĩrĩhĩrie ũũru wake. Ambata wĩinũkĩre gwaku mũciĩ na thayũ.’ Thutha-inĩ rĩrĩa Nabali akuire, Abigaili agĩgĩtuĩka ũmwe wa atumia a Daudi.