NANCHI wamuyuka mwanamukazhi walamba wasambakene Davida nyi? Jizhina janji wajinga Abigaila. Wajinga na maana kabiji wakwashishe Davida kubula kuba kintu kyatama. Bino saka tukyangye kufunda kino, akitwaya tumone byamwekejile Davida.

Davida byo amunyemene Saulo, wakafyamine mu kibwe. Bakolojanji ne bakwabo ba mu kisemi kyanji bamulondejile konkakwa. Banabalume bafika ku 400 bonse bayile ko ajinga kabiji Davida waikele ke ntangi wabo. Kabiji Davida wayile kwi mfumu wa bena Moabu ne kumwambila’mba: ‘Nemupopwela, nasaka namba batata ne bamama beye mwikalenga nabo, poso nkayuke kikamwekela.’ Davida ne bantu banji batendekele kwikala mu mitumba.

Panyuma ya bino, Davida po po asambakene Abigaila. Mwata wanji, aye Nabala wajinga munonshi wajinga na bujimi bukatampe. Wajinga na mikooko 3,000 ne bambuzhi 1,000. Nabala wajinga na muchima watama. Pano bino, mukazhanji, aye Abigaila walambile bingi. Kabiji waubanga bintu byawama. Kimye kimo, wapulwishe ne kisemi kyanji. Twaya tumone byo ebapulwishe.

Davida ne bantu banji bamukwashanga Nabala. Balamanga mikooko yanji. Juba jimo, Davida watumine bantu banji bamo kuya na kwambila Nabala amba ebakwasheko. Bantu ba kwa Davida bafikile kwi Nabala kimye aye ne bamingilo banji kyo batendelenga boya bwa mikooko. Jajinga juba ja kusangalala kabiji Nabala wajinga na kajo kavula. Bantu ba kwa Davida baambile’mba: ‘Twajinga bantu bawama bingi kwi anweba. Kechi twaibilepo mukooko wenu nangwa umo ne, bino twiilaminengatu bulongo. Twimupopwela, tupepoi bya kuja.’

Nabala wibakumbwile’mba: ‘Kechi nsakupana kajo kami kwi anweba bantutu ne.’ Wibakumbwile bingi na bukaji ne kwamba byambo byatama pe Davida. Bano banabalume byo babwelele ne kubula Davida bibamwekejile, Davida wazhingijile bingi. Waambijile bantu banji amba: ‘Vwalai mapoko enu bonsetu!’ Kabiji baimene, kebaye ne kuya amba bakepaye Nabala ne bantu banji.

Muntu umo wa kwa Nabala, awo waumvwine byambo byatama byaambile Nabala, wamubujile Abigaila byamwekele. Ponkapotu, Abigaila wanengezhezhe kajo. Wikapaikile kajo pa bambongolo ne kutendeka lwendo lwanji. Byo amumwene Davida, wafuminepo pa mbongolo, waponena ne ku maulu anji ne kumwambila’mba: ‘Nkambo yami, nasasapo, kange mumvwe bibena kwamba mwata wami Nabala ne. Kechi uji na maana ne, kabiji ubatu bya bumbulwamaana. Bya bupe bye byo naleta. Mwane, tambulai kabiji mwitulekeleko mambo pa bintu byamwekele.’

Davida wamwambijile’mba: ‘Wimwanamukazhi wa maana. Wandengela kubula kwipaya Nabala ne kushinkanya bubi bwanji bo aubile. Bwela pano ku nzubo mu mutende.’ Pa kupitapo kimye, Nabala byo afwile, Abigaila waikele ke umo wa bakazhi banji Davida.