YU NO udat na dis fayn uman we de kam mit Devid? Na in nem Abigɛl. Na uman we gɛt sɛns. Wan tɛm, i mek Devid nɔ du wan bad tin. Bifo wi lan bɔt dat, lɛ wi lan fɔs bɔt wetin bin dɔn de apin to Devid.

We Devid rɔnawe pan Sɔl, i bin de ayd insay dɛn ol we de na dɛn big ston. In brɔda dɛn ɛn ɔl in ɔda fambul dɛn bin go mit am de. Na bin lɛk 400 man dɛn so bin go mit am, ɛn Devid bin bi dɛn lida. Dɔn Devid go to di kiŋ we de na Moab ɛn tɛl am se: ‘Duya lɛ mi mama ɛn mi papa kam de wit una te a no wetin go apin to mi.’ Leta, Devid ɛn in man dɛn bigin ayd na dɛn il dɛn.

Na afta dis Devid ɛn Abigɛl mit ɔp. Abigɛl in man we nem Nebal, bin jɛntri ɛn gɛt bɔku land. I gɛt 3,000 ship ɛn 1,000 got. Nebal na bad man. Abigɛl fayn ɛn i no aw fɔ du di rayt tin. Wan tɛm i sev in wan ol famili. Lɛ wi si aw i du dis.

Devid ɛn in man dɛn bin dɔn de ɛp Nebal. Dɛn bin de ɛp fɔ wach in ship dɛn. So wan de, Devid sɛn sɔm pan in man dɛn to Nebal. We dɛn kam to Nebal, dɛn mit in ɛn sɔm pipul dɛn de kɔt di ship dɛn ia. Na bin de fɔ lɛ dɛn ɛnjɔy dɛnsɛf ɛn Nebal bin gɛt bɔku tin fɔ it. So Devid in man dɛn tɛl Nebal se: ‘Wi dɔn du yu gud. Wi nɔ tif yu ship dɛn, bɔt wi ɛp fɔ luk dɛn fɔ yu. Duya, wi want mek yu gi wi tin fɔ it.’

Nebal tɛl dɛn se: ‘A nɔ de gi mi it to pipul dɛn lɛk una.’ I nɔ tɔk fayn to dɛn, ɛn i tɔk bad tin dɛn bɔt Devid. We di man dɛn go bak to Devid ɛn tɛl am ɔltin we apin, Devid vɛks bad. I tɛl in man dɛn se: ‘Una tek una sɔd dɛn.’ Dɔn dɛn bigin go fɔ go kil Nebal ɛn in pipul dɛn.

Wan pan Nebal in man dɛn bin yɛri di bad we aw Nebal tɔk to Devid in man dɛn. So i go tɛl Abigɛl wetin dɔn apin. Abigɛl tek tin dɛn fɔ it wantɛm, ɛn put dɛn pan dɔnki. Dɔn i bigin fɔ go mit Devid. We i mit Devid, i kam dɔŋ in dɔnki, ɛn butu to Devid. Dɔn i tɛl Devid se: ‘Duya sa, nɔ lisin to mi man. In na fulman ɛn i kin du tin lɛk se i nɔ gɛt sɛns. A kam wit dɛn tin ya fɔ yu. Duya tek dɛn, ɛn wi de beg fɔ wetin apin.’

Devid tɛl am se: ‘Yu na uman we gɛt sɛns. Yu dɔn mek a nɔ go kil Nebal pan ɔl we i du mi bad. Nɔ wɔri, go na os.’ Leta we Nebal day, Abigɛl bi wan pan Devid in wɛf dɛn.