ပူ ၆၀
အဘံၤကါယံးလး ဒီးဒၤဝံး အဂ့ၢ်
နသ့ၣ်ညါ ပိာ်မုၣ်ဃံလၤဖိအံၤလၢ အဟဲထံၣ်ဒၤဝံးန့ၣ်ဧါ. အမံၤမ့ၢ်ဝဲ အဘံၤကါယံးလးန့ၣ်လီၤ. အဝဲဒၣ်အတၢ်ကူၣ်တၢ်ဆးဂ့ၤဒီး တြီဝဲဒၤဝံး ဒ်သိးသုတမၤဘၣ်ဝဲ တၢ်မၤအအၢန့ၣ်လီၤ. ဘၣ်ဆၣ် တချုးပကတိၤတၢ်အံၤအဂ့ၢ်န့ၣ် မ်ပကကွၢ်သကိး တၢ်မၤတ့ၢ်အသးဒီးဒၤဝံးဒ်လဲၣ်န့ၣ်တက့ၢ်.
ဒၤဝံးန့ၣ် ဃ့ၢ်ဟးထီၣ်လၢစီလူးအအိၣ်ဝံၤအလီၢ်ခံ အိၣ်ခူသူၣ်ဝဲဒၣ်လၢ လ့ကအိတခါအပူၤန့ၣ်လီၤ. အဝဲၢ်တဖၣ်ဒီးအပှၤဟံၣ်ဖိဃီဖိတဖၣ်စ့ၢ်ကီး ဟဲစူးရိဖှိၣ်ဒီးအီၤန့ၣ်လီၤ. ပှၤ ၄၀၀ ဃၣ်ဃၣ်ဟဲဆူအအိၣ်ဒီး ဒၤဝံးကဲထီၣ် အဝဲသ့ၣ်အခိၣ်န့ၣ်လီၤ. ထဲန့ၣ်ဒီး ဒၤဝံးလဲၤဆူ မိၤအးအစီၤပၤအအိၣ်ဒီးဃ့ကညးဝဲဒ်အံၤလီၤ. ‘ဝံသးစူၤ, ဒုအိကဒု ယမိၢ်ဒီးယပၢ်ဒီးနၤ တုၤလီၤလၢ ယသ့ၣ်ညါတၢ်ကမၤအသးဒီးယၤ ဒ်လဲၣ်အကတီၢ်န့ၣ်တက့ၢ်.’ လၢတၢ်န့ၣ်အလီၤခံ ဒၤဝံးဒီးအပှၤတဖၣ်န့ၣ် အိၣ်ခူသူၣ်ဝဲသ့ၣ်လၢ ကစၢၢ်ကလိတဖၣ်အလိၤန့ၣ်လီၤ.
တၢ်မၤတ့ၢ်အသးတဖၣ်န့ၣ် ဝံၤအလီၢ်ခံမးဒီး ဒၤဝံးဒီးအဘံၤကါယံးလး ထံၣ်လိာ်အသးန့ၣ်လီၤ. အဘံၤကါယံးလးအဝၤနၤဘလးန့ၣ် မ့ၢ်စံာ်ကစၢ်လၢ အကဲဒိၣ်တဂၤန့ၣ်လီၤ. အိၣ်ဝဲဒီးသိအဒု ၃,၀၀၀, မဲာ်တဲးလဲး ၁,၀၀၀ န့ၣ်လီၤ. နၤဘလးမ့ၢ် ပှၤသးအၢတဂၤန့ၣ်လီၤ. ဘၣ်ဆၣ်, မ့မ့ၢ်အမါတခီ ဃံလၤဒိၣ်မးဒီး, သ့ၣ်ညါမၤ တၢ်လၢအကြၢးအဘၣ်န့ၣ်လီၤ. ဘၣ်တဘျီန့ၣ် အုၣ်က့ၤခိၣ်က့ၤဝဲအပှၤဟံၣ်ဖိဃီဖိအသးသမူ ဒၣ်လဲာ်န့ၣ်လီၤ. အုၣ်က့ၤခီၣ်က့ၤဝဲဒ်လဲၣ်န့ၣ် ပကွၢ်သကိးတက့ၢ်.
ဒၤဝံးဒီးအပှၤတဖၣ်န့ၣ် အိၣ်ဒီးတၢ်သူၣ်ဂ့ၤသးဝါလၢ နၤဘလးအဖီခိၣ်န့ၣ်လီၤ. ကဟုဘံၣ်ကယာ်ဘၢန့ၢ်အသိတဖၣ်လီၤ. တုၤနုၤတစု, ဘၣ်မုၢ်တနံၤန့ၣ် ဒၤဝံးပျၢ်လီၤအပှၤတဖၣ်လၢ အကဃ့တၢ်မၤစၢၤတခါလၢ နၤဘလးအအိၣ်န့ၣ်လီၤ. ဒၤဝံးအပှၤတဖၣ်ဟဲတုၤဝဲ ဖဲနၤဘလးဒီးအပှၤတဖၣ် တံာ်သိဆူၣ်အခါန့ၣ်လီၤ. အကတီၢ်အံၤ မ့ၢ်ဘူၣ် အမုၢ်နံၤတနံၤအဃိ နၤဘလးအိၣ်ဒီးတၢ်အီၣ်တၢ်အီအါမံၤအါမၠိ အါမးန့ၣ်လီၤ. တုၤနုၤတစု, ဒၤဝံးအပှၤတဖၣ်စံး, ‘ပဝဲပမၤဘျုးမၤဖှိၣ်တ့ၢ်နၤလံ. ပတဟုၣ်နသိနီတဒုဘၣ်. ပကွၢ်န့ၢ်နသိတဖၣ်လီၤ. လၢတၢ်န့ၣ်အဃိ ဝံသးစူၤဟ့ၣ်ပှၤတၢ်အီၣ်တၢ်အီတနီၤတက့ၢ်.’
နၤဘလးစံးဝဲဒၣ်, ‘ပှၤဒ်သိးသုတဖၣ် ယတဟ့ၣ်သုလၢယတၢ်အီၣ်ဘၣ်’ ဒီးကတိၤတဲာ်တူာ်အၢအၢသီသီ ဆါဘျဲးဆါဘျီးတၢ်န့ၣ်လီၤ. ကတိၤဝဲစ့ၢ်ကီးဒၤဝံးတဂ့ၤအဂ့ၢ်န့ၣ်လီၤ. ဖဲဒၤဝံးအပှၤတဖၣ် ဟဲက့ၤတဲအီၤအခါ ဒၤဝံးအသးထီၣ်ဝဲဒိၣ်မးန့ၣ်လီၤ. စံးဘၣ်ဝဲအပှၤတဖၣ်, ‘ဟံးထီၣ်သုနးတက့ၢ်.’ တုၤနုၤတစု, အဝဲသ့ၣ်ထွးထီၣ်ဝဲဒၣ်လၢ ကလဲၤမၤသံနၤဘလးဒီး အပှၤတဖၣ်အဂီၢ်န့ၣ်လီၤ.
နၤဘလးအပှၤတဂၤလၢ အနၢ်ဟူ နၤဘလးအတၢ်ကတိၤ အအၢအသီန့ၣ် က့ၤတဲဘၣ်အဘံၤကါယံးလးလၢ တၢ်မၤအသးတဖၣ်န့ၣ်လီၤ. တဘျီဃီန့ၣ် အဘံၤကါယံးလး ကတဲာ်ကတီၤဝဲတၢ်အီၣ်တၢ်အီဒီး ဟဲပဒၢးထီၣ်ဝဲလၢကသ့ၣ်ယီၤတဖၣ် အဖီခိၣ် ဒီးလဲၤတၢ်န့ၣ်လီၤ. ဖဲအထံၣ်ဒၤဝံးအခါ စံၣ်လီၤဝဲလၢ ကသ့ၣ်ယီၤအလိၤဒီး တီၤလီၤကဒွံကျိာ်ဝံၤ စံးဘၣ်ဝဲဒၣ်ဒၤဝံး, ‘ကစၢ်ဧၢ ဝံသးစူၤဒီး သုတကနၣ်ဃုာ်ယဝၤနၤဘလးတဂ့ၤ, အဝဲမ့ၢ်ပှၤအၢဒီး မၤတၢ်အၢတဖၣ်န့ၣ်လီၤ. လၢအံၤ ယဟဲစိာ်တၢ်ဟ့ၣ်တဖၣ်လၢနဂီၢ်, ဝံသးစူၤတူၢ်လိာ်ဘၣ်တက့ၢ်. ပျၢ်ဘၣ်ပှၤဘၣ်ဃး တၢ်လၢအမၤတ့ၢ်အသးတဖၣ်အဃိန့ၣ်တက့ၢ်’ န့ၣ်လီၤ.
ဒၤဝံးစံးအီၤ, ‘နမ့ၢ်ပိာ်မုၣ်လၢအကူၣ်ဘၣ်ကူၣ်သ့တဂၤလီၤ. နတြီယၤဒ်သိး ယတမၤဆၢက့ၤ နၤဘလးအတၢ်အၢ ဒီးမၤသံအီၤန့ၣ်လီၤ. ခဲအံၤ က့ၤခုၣ်ခုၣ်မုာ်မုာ်ဆူဟံၣ်တက့ၢ်’ န့ၣ်လီၤ. လၢခံန့ၣ် နၤဘလးသံဝဲဒီး အဘံၤကါယံးလးန့ၣ် ဟဲကဲထီၣ်ဝဲ ဒၤဝံးအမါတဂၤလီၤ.