KANI ulimwisi umwanakasi umulombe uulukwisa mu kucinsya Dafidi? Isina lyakwe ni Abigayili. Alikwete akalango akaweme, kabili acicila Dafidi ukucite’cintu icibipile. Pano ili tatungasambilila pali cici, leka tubone ifyalukucitika kuli Dafidi.

Panuma ili Dafidi abutuka ukufuma kuli Saulu, afisama mwi cengo. Abakwabo na bonse abasyala aba mu lupwa lwakwe baya uku ali. Cipale abalalume 400 bonse baisa kuli ye, kabili Dafidi aba intangisi yabo. Dafidi eli aya ku mfumu ya ku Moabi ne kulabila ati: ‘Ndukumukombeteleni ati lekeni batata na bamama bekale nenu mpaka nkabone ifikacitika kuli nebo.’ Mukupita kwa mpindi Dafidi ne balalume bakwe batatiko’kufisama mu mapili.

Nipanuma ya fifi eli Dafidi akumanya Abigayili. Nabali umulume wakwe alikwete amaboni ne mpanga. Alikwete imbelele 3,000 ne mbusi 1,000. Nabali muntu wa mupufyo. Pano Abigayili umukasi wakwe muweme ukwakuti. Kabili, alisi ifya kucite’filungeme. Umuku umo apulusyako ulupwa lwakwe. Leka tubone ifi acitile’fi.

Dafidi ne balalume bakwe bacito’luse kuli Nabali. Baofwa ukulame’mbelele syakwe. Popele kambi kasuba Dafidi atuma bamo bamo abalalume bakwe mu kulomba Nabali ukubofwa. Abalalume bakwe Dafidi baisa kuli Nabali ili ye ne bakumofwako balukubeya amasako ambelele. Kali kasuba ka maliila, kabili Nabali alikwete’fintu ifingi ifiweme ifya kulya. Popele’fi efi abalalume bakwe Dafidi balabila: ‘Twacite’fya luse kuli mwebo. Tatwibilepo neli imo iya mbelele syenu, pano twaofwa ukusilama. Lomba pano, tupeniko ifyakulya.’

Nabali alabila’ti: ‘Nsikapelapo ifyakulya fyangi ku balalume abali koti ni mwebo.’ Alabila mu nsila ya mupufyo, kabili alabila ne fintu ifibipile pali Dafidi. Ili abalalume babwelela ne kumubula Dafidi pali cici, Dafidi akalipa ukwakuti. Aeba abalalume bakwe ati: ‘Kakeni mwense impoko syenu!’ Kabili batatikako ne lwendo lwabo mu kwipaya Nabali ne balalume bakwe.

Umbi umusankwa wakwe Nabali, uwaumfwileko amasiwi amupufyo Nabali alabile, abulako Abigayili ifyacitika. Penka’po Abigayili apekanya ifyakulya. Afitwika pa mbongolo simo ne kutatikako ulwendo lwakwe. Ili akumanya Dafidi, Abigayili aseluka pa mbongolo yakwe, ainamisya pansi ne kulabila’ti: ‘Ndukumukombeteleni, mwe basikulu, mwikutika kuli Nabali umulume wanji. Mutumpile, kabili alacite’fintu ifitumpile. Icabupe’ci. Ndukumukombeteleni mucipoke, kabili mutufitulukile pa fyacicitika.’

Dafidi aasuka ati: ‘Uli mwanakasi wa mano. Wankanya ukwipaya Nabali ati mubwelesyemo pa mupufyo acita. Bwelela ku ŋanda mu mutende.’ Panuma, ili Nabali afwa, Abigayili aba umo uwa bakasi bakwe Dafidi.

1 Samweli 22:1-4; 25:1-43.