Abigaili Pi Daudi Be
A’DIKO 60
Abigaili Pi Daudi Be
MI NI oku ndrizaru emu pi dri fupi Daudi be ’di ri ra ya? Eri ma ru Abigaili i. Eri onduaru, ani atri Daudi ni ecozu e’yo onzi ’yezu ku. De nga amu ni e’yo onizu eri ma dria ku, ama ma ne nga a’du e’yo ebi i ’ye Daudi be ni’ari.
Daudi ni apazu Saulo si ’bo ri ma vutia, nga i zi oni gulea. Eri ma adripika ki ’ba eri vule akua ’diyi pie dria emuki o’azu eri be. ’Ba ogogo 400 ma drilea emuki erivu, ani Daudi eca di eyi ma drileru. Daudi nga di mu opi Moabua ri vu kini: ‘Kirikiri ni mi fe ma ati pi ma o’aki ma andri be mi vu ’dia kpere mani nezu a’du e’yo ni nga i ’ye ma rua nia’ni.’ Vutinia Daudi pi ’ba ivile ’diyi pie e’doki di o’a oni egulea.
’Di ma vutia, Daudi nga dri fu Abigaili be. Eri vile agupi Nabali ni ndra ’ba azi lonyi be tu ’dinile ni. Eri ma Kabilo ndra 3,000 dika indri 1,000. Nabali ni ’ba azi edemacu ru ni. Te erivile oku Abigaili ma adriza ndri saaru. Ni vini e’yo onyiru ’yezu ra. Ani nga ’ba i vile akua ’diyi ki pa ra. Aneki ngoni ngoni’ari.
Daudi ni ’ba erivile ’diyi be ebiki ovu yiki si Nabali vu. Mbaki kabilo erini ma ta kilili ru. Ani o’du alu Daudi pe ’ba ivile ’diyi ma ti azakoma zizu Nabali vu. Nabali ni kabilo ma biko oliria ’ba i vule ’diyi pie ria, ’ba Daudi ni nga eca eri vu. ’Dini ovule o’du omu ni risi, Nabali nga nyaka obi ndundu ede nyazaru. ’Ba Daudi vile ’diyi nga ’yo dini: ‘Ama ebiki ovu yikisi emivu. Ama ogu ni kabilo emini aluni ku, kanisi akoki emi aza eyi ta mbazu. Ani e’yo ’disi ifeki amani nyaka.’
Nabali omvi kini: ‘Acani nyaka mani fe ’ba emile ’diyi ni ku.’ Nga e’yo nze geri azi onzi ’dinile nisi dika inza vini Daudi ni saaru. ’Ba nde ’diyi ni dri egozu Daudi vu ria, ece ki e’yo nde ’diyi dria Daudi dri ani a’oko nya eri saaru. Nga ’yo eyi tia: ‘Emi o’du sei emini!’ Coti koki dri muzu Nabali pi o’dizu ’ba erivu ’diyi pie.
’Ba Nabali ni ma azi alu ndra e’yo onzikanyaru Nabali ni nze ’diyi eripi ra ni ma azi mu e’yo ’diyi ecezu Abigaili ni. Coti Abigaili nga nyaka otu gonde. Nga akanya ini ’diyi ki ’du aci e’dozu coti. Eri ni dri furia Daudi beria, nga isi akanya driasi, si kumuti va ’yo ’dini: ‘Kirikiri mi ma eri e’yo agupi mani Nabali ma tia ku fo. Eri ’ba azazaru dika eri e’yo azaza ’dinile ’diyi ’ye. Feta mini ri di. Kirikirisi mi ’du yi dika mi otru ama e’yo eyi ’yepi mima rua ’disi te.’
Daudi omvi kini: ‘Mi oku ondua ru ni, mi atri ama e’yo onzi Nabali ni ti ofezu risi ra. E’yo ’disi mi mu akua asianzu si.’ ’Di ma vutia Nabali nga dra ra, Abigaili nga eca oku Daudi ni ma azi ru.
