ອາບີຄາລີແລະດາວິດ
ບົດ 60
ອາບີຄາລີແລະດາວິດ
ເຈົ້າຮູ້ຈັກສະຕີງາມທີ່ພວມຍ່າງມາຫາດາວິດບໍ? ນາງຊື່ອາບີຄາລີ. ນາງເປັນຄົນມີເຫດຜົນດີ ແລະໄດ້ຍັບຢັ້ງດາວິດຈາກການເຮັດສິ່ງບໍ່ດີ. ແຕ່ກ່ອນທີ່ເຮົາຈະຮຽນກ່ຽວກັບເລື່ອງນັ້ນ ໃຫ້ເຮົາພິຈາລະນາເຖິງເຫດການທີ່ໄດ້ເກີດຂຶ້ນກັບດາວິດ.
ຫຼັງຈາກດາວິດໜີຈາກຊາອຶເລ ເພິ່ນເຊື່ອງຕົວຢູ່ໃນຖ້ຳ. ພວກອ້າຍແລະຄົນອື່ນໆພາຍໃນຄອບຄົວຕ່າງມາສົມທົບກັບເພິ່ນທີ່ນັ້ນ. ພວກຜູ້ຊາຍທັງໝົດປະມານ 400 ຄົນມາສົມທົບກັບເພິ່ນ ແລະດາວິດກາຍເປັນຜູ້ນຳຂອງພວກນັ້ນ. ແລ້ວດາວິດກໍ່ໄປຫາກະສັດແຫ່ງແຜ່ນດິນໂມອາບແລະທູນວ່າ: ‘ຂໍໂປດໃຫ້ພໍ່ແລະແມ່ຂອງຂ້າພະເຈົ້າຢູ່ກັບທ່ານຈົນກວ່າຂ້າພະເຈົ້າຊາບວ່າຈະມີອັນໃດເກີດຂຶ້ນແກ່ຂ້າພະເຈົ້າ.’ ຕໍ່ມາດາວິດແລະຄົນຂອງເພິ່ນເຊື່ອງຕົວຢູ່ຕາມເນີນພູເຂົາ.
ຫຼັງຈາກນີ້ດາວິດພົບກັບອາບີຄາລີ. ນາບາເລຜົວນາງເປັນເຈົ້າຂອງທີ່ດິນທີ່ຮັ່ງມີ. ເຂົາມີແກະ 3,000 ຕົວແລະແພະ 1,000 ຕົວ. ນາບາເລເປັນຄົນຊົ່ວໃຈແຄບ. ແຕ່ອາບີຄາລີເມຍຂອງເຂົາກໍ່ເປັນຄົນງາມຫຼາຍ. ນອກຈາກນີ້ນາງຮູ້ຈັກເຮັດສິ່ງທີ່ຖືກຕ້ອງສົມຄວນ. ຄັ້ງນຶ່ງນາງຍັງໄດ້ຊ່ວຍຊີວິດຄອບຄົວຂອງນາງໄວ້. ໃຫ້ເຮົາເບິ່ງວ່ານາງເຮັດຢ່າງໃດ.
ດາວິດແລະພວກຂອງເພິ່ນເຄີຍສະແດງຄວາມກະລຸນາຕໍ່ນາບາເລ. ພວກເຂົາໄດ້ຊ່ວຍປ້ອງກັນຝູງແກະຂອງເຂົາ. ດັ່ງນັ້ນມື້ນຶ່ງດາວິດສົ່ງບາງຄົນຂອງຕົນໄປຫານາບາເລເພື່ອຂໍຄວາມກະລຸນາ. ຄົນຂອງດາວິດມາຫານາບາເລຂະນະທີ່ເຂົາແລະພວກຜູ້ຊ່ວຍພວມຕັດຂົນແກະຢູ່. ມື້ນັ້ນເປັນມື້ຊຶ່ງມີການກິນລ້ຽງ ແລະນາບາເລມີອາຫານທີ່ດີຫຼາຍຢ່າງກິນ. ຄົນຂອງດາວິດເວົ້າດັ່ງນີ້: ‘ພວກເຮົາໄດ້ສະແດງຄວາມກະລຸນາຕໍ່ທ່ານ. ພວກເຮົາບໍ່ເຄີຍລັກແກະຂອງທ່ານ ແຕ່ພວກເຮົາໄດ້ຊ່ວຍເບິ່ງແຍງແກະເຫຼົ່ານັ້ນ. ບັດນີ້ຂໍທ່ານໃຫ້ອາຫານແກ່ພວກເຮົາບ້າງ.’
ນາບາເລເວົ້າວ່າ: ‘ເຮົາຈະບໍ່ໃຫ້ອາຫານຂອງເຮົາແກ່ຄົນຄືພວກເຈົ້າ.’ ເຂົາເວົ້າໃນທາງບໍ່ໜ້າຟັງແລະກ່າວສິ່ງຊົ່ວຕ່າງໆເຖິງດາວິດ. ເມື່ອຄົນເຫຼົ່ານີ້ກັບໄປກໍ່ເລົ່າເລື່ອງໃຫ້ດາວິດຟັງ ດາວິດກໍ່ຄຽດຫຼາຍ. ເພິ່ນຈຶ່ງສັ່ງພວກຂອງຕົນວ່າ: ‘ຈົ່ງເອົາດາບຄາດແອວໄວ້!’ ແລ້ວພວກເຂົາກໍ່ພາກັນເລີ່ມເດີນທາງຈະໄປຂ້ານາບາເລແລະພວກຄົນຂອງເຂົາ.
ຄົນຂອງນາບາເລຄົນນຶ່ງຊຶ່ງໄດ້ຍິນຄຳເວົ້າຫຍາບຊ້າທີ່ນາບາເລເວົ້ານັ້ນ ກໍ່ເລົ່າເລື່ອງນັ້ນໃຫ້ອາບີຄາລີຟັງ. ທັນໃດນັ້ນອາບີຄາລີກໍ່ຮີບຈັດແຈ່ງອາຫານໄວ້ພ້ອມ. ນາງຂົນເອົາອາຫານໃສ່ເທິງຫຼັງລາແລ້ວກໍ່ອອກເດີນທາງ. ເມື່ອນາງພົບດາວິດນາງກໍ່ຮີບລົງຈາກຫຼັງລາ: ແລ້ວກົ້ມໜ້າລົງຕໍ່ດາວິດແລະກ່າວວ່າ: ‘ທ່ານເຈົ້າຂ້າ ຂໍຢ່າເອົາໃຈໃສ່ເລື່ອງນາບາເລຜົວຂອງຂ້ອຍເລີຍ. ເຂົາເປັນຄົນໂງ່ແລະເຮັດສິ່ງທີ່ບໍ່ສະຫຼາດ. ນີ້ຄືຂອງຂວັນ. ຂໍໂປດຮັບເອົາແລະຂໍກະລຸນາຍົກຜິດແກ່ພວກເຮົາໃນເລື່ອງທີ່ເກີດຂຶ້ນນັ້ນ.’
ດາວິດຕອບວ່າ: ‘ເຈົ້າເປັນສະຕີທີ່ສະຫຼາດ ເຈົ້າໄດ້ຍັບຢັ້ງເຮົາຈາກການຂ້ານາບາເລເພື່ອແກ້ແຄ້ນຄວາມຊົ່ວໃຈແຄບຂອງເຂົາ. ບັດນີ້ຈົ່ງກັບບ້ານດ້ວຍສັນຕິສຸກເຖີດ.’ ຕໍ່ມາເມື່ອນາບາເລຕາຍ ອາບີຄາລີກໍ່ກາຍມາເປັນເມຍຄົນນຶ່ງຂອງດາວິດ.
