LELO uyukile mwana-mukaji mupopoke wiya kusambakana Davida’u? Dijina dyandi i Abikele. Udi na ñeni miyampe, kadi wakankaja Davida kulonga kintu kibi. Ino kumeso kwa kuyuka kino, tutalei bidi i bika byafikila Davida.

Davida wefi mu muta pa kupwa kunyema Solo. Banababo ne ba mu kisaka bakwabo abaiya kushikata nandi. Kubaiya ne kubwipi kwa bantu 400, penepo Davida waikala mwendeji wabo. Kupwa Davida waenda kukanena mulopwe wa Moabu’mba: ‘Nakwisāshila, ba tata ne lolo bashikate bidi nenu, ntale mobisa nkumpityila.’ Mwenda mafuku Davida ne bantu bandi abakafyama mu ngulu.

Kupwa’tu kino, Davida wetana na Abikele. Wandi mulume Nabalu i mpeta udi na ntanda. Udi na mikōko 3 000 ne bambuji 1 000. Nabalu i muntu wa nshikani. Inoko wandi mukaji Abikele i mwana-mukaji mupopoke kashā. Kadi uyukile kulonga byoloke. Kitatyi kimo wapandije ne kisaka kyandi. Tutalei mwaekipandijije.

Davida ne bantu bandi balongēle Nabalu biyampe. Bakingile ne mikōko yandi. Difuku dimo Davida watume bengidi bandi bamo bakalombe Nabalu bukwashi. Bengidi ba Davida abafika kudi Nabalu enka kitatyi kyatenda myoya ya mikōko na bantu bakwabo ba kumukwasha’ko. I difuku dya masobo, kadi Nabalu udi na bidibwa bivule. Penepo bantu ba Davida abamunena’mba: ‘Twadi biyampe nobe. Kadi ketwaibilepo mukōko obe nansha umo, ino twakukweshe mu kwiilama. Shi ke pano, tubakwisāshila, witupe’ko bidibwa.’

Nabalu wanena’mba: ‘Nkikapānapo bidibwa byami ku bantu badi bwa banwe.’ Wanena na kapuni ne kunenena Davida bibi. Bantu pa kujoka, abasapwila Davida uno mwanda, Davida wakalabala. Wanena bantu bandi amba: ‘Selai bipete byenu!’ Penepo abaanza kwenda kukepaya Nabalu ne bantu bandi.

Ebiya umo wa mu bantu ba Nabalu, waivwene binenwa bya kapuni bya Nabalu, wasapwila Abikele mobyapityile. Ponka’po Abikele wabunge bidibwa. Watwika’byo bampunda bamo kaenda. Pa kwisambakana na Davida, watūka pa mpunda wandi kaevukwila panshi’mba: ‘Mfumwami nakwisāshila, kokatalapo mulumyami Nabalu. I mulembakane, kadi ne byalonga bine i enka bya bulembakane. Tala byabuntu. Wibitambule, kadi witufwile lusa na byobakulongele.’

Davida walondolola’mba: ‘Wi mwana-mukaji wa ñeni. Ubandekeja kwipaya Nabalu mwanda wa kumulubwila kinongo kya nshikani yandi. Wijokele kobe talala.’ Kupwa Nabalu wafu, ne Abikele waikala umo wa mu bakaji ba Davida.