MPANJI 60

Abigayili naDavidi

WUNAMWILUKI iwu mumbanda walubanji wunakwinza nakumubulakana Davidi? Ijina dindi diyi Abigayili. Wukweti maana amawahi, nawa namukañeshi Davidi kukoña chuma chatama. Henohu kanda tudizi hanichi, tusambili tutali chuma chamumwekeneni Davidi.

Chelili Davidi namutemuki dehi Sawulu, hakuya nakuswama mwiyeñu. Ana kwindi nichisaka chindi chejima hiyakumulondela. Kwakwihi nawamayala 400 hiyakwinza nakudibomba nindi, nawa Davidi hakwikala nlomboli yawu. Davidi hakuya kudi mwanta wakuMowabi nakumuleja nindi: ‘Mwani ayiteji atata namama ashakami kudeyi, kushika tuhu nichinikeluka chikanmwekena.’ Nkumininaku Davidi niantu jindi hiyakuswama mumapidi.

Hanyima yanichi Davidi hakudibulakana naAbigayili. Nfumwa Abigayili Nabali hisamaheta mwini mpata. Wukweti anyikoku 3,000 niampembi 1,000. Nabali himuntu wabula luwi. Ilaña iñodindi Abigayili wasweja lubanji. Nawa weluka chakwila mwaloña. Wapulwishahu dehi nichisaka chindi. Tutalenu chichadiña.

Davidi niantu jindi amwilili chiwahi Nabali. Amukwashiliku kukiña anyikoku jindi. Ifuku dimu Davidi hakutemesha antu jindi kudi Nabali kulonda ayikwashiku. Antu jaDavidi hiyakwinza kudi Nabali henohu yena niankwashi jindi anakutewula anyikoku mavuji. Hifuku dachawija nawa Nabali wudi nayakudya yayiwahi yayivulu. Antu jaDavidi hiyakumuleja nawu: ‘Twakwilili chiwahi. Hitwakwiyililuhu mukoku hela wumuku, ilaña twakukwashiliku kuyihemba. Dichi dinu mwani, atwinkihu yakudya.’

Nabali hakwakula nindi, ‘Hinukuhana yakudya yami kudi antu adi neyi enuku.’ Hakuhosha munjila yabula kushikilamu chikupu, nakuhosha mazu atama hadi Davidi. Chanafuntiwu amayala nakumulejamu Davidi haniyi nsañu, Davidi hakuhila nankashi. Hakuyileja antu jindi nindi, ‘Sendenu mpoku jenu jatubali!’ Akasa nilwendu lwakuya nakumujaha Nabali niantu jindi.

Wumu hadi antu jaNabali watiyili mazu atama ahosheliyi Nabali, hakumuleja Abigayili chamwekeni. Hohenohu Abigayili hakuloñesha yakudya. Hakuloñejeka hayimbulu nakutachikaku lwendu lwindi. Chinamubulakaniyi Davidi, hakusuluka hachimbulu chindi, hakufukama nakuhosha nindi: ‘Amwanta, mwani, bayi muta maana hadi nfumwami Nabaliku. Hichisupi nawa welaña yuma yawusupi hohu. Chawaana ichi. Achitambuli mwani, nawa atwanakeni hayuma yamwekeni.’

Davidi hakumwakula nindi, ‘Wudi mumbanda wamaana. Wunankañeshi kumujaha Nabali nakumufweta kutama kwindi. Funtaku kumukala mukuwunda.’ Nkumininaku chanafwiyi Nabali, Abigayili hakwikala wumu hadi añodi jaDavidi.

1 Samweli 22:1-4; 25:1-43.