YÃMB mii pʋg-​neer ning sẽn kẽnd n segd a Davɩɩdã bɩ? A yʋʋr la a Abigayille. A ra tara yam, la a kɩtame t’a Davɩɩd pa maan wẽng ye. La nand tɩ d gom rẽ yelle, d reng n ges bũmb ning sẽn paam a Davɩɩde.

A Davɩɩd sẽn wa n zoe n yi a Sayull zakẽ wã, a tɩ solga tãng bokẽ. A kẽem dãmbã la a zakã rãmb fãa tɩ bʋʋg-⁠a-⁠la beenẽ. Yaa sẽn na ta neb kobs-​naas n tɩ bʋʋg a Davɩɩde, t’a Davɩɩd lebg b taoor soaba. A Davɩɩd kẽnga Moaab rĩmã nengẽ n tɩ yeel-⁠a yaa: ‘Mam dat n bõosa foo tɩ m ba wã ne m ma wã zĩnd ne foo, hal tɩ m wa bãng bũmb ning sẽn na n paam-⁠ma.’ Rẽ poore, a Davɩɩd ne rap nins sẽn da tũud-⁠a wã ra zoet n soonda tãensã bogdẽ.

Yaa a Davɩɩd sẽn wa n yi tãensẽ wã poor la a seg a Abigayille. A Abigayill sɩd a Naball ra yaa rakãagr sẽn tar pʋt wʋsgo. A ra tara piis tus a tã la bʋʋs tusri. A Naball ra yaa nin-​wẽnga, la a pag a Abigayill ra yaa pʋg-​neer la pag sẽn tar yam. Raar a yembr menga, a fãaga a zaka rãmba. Bɩ d ges sẽn yɩ to-⁠to.

A Davɩɩd ne a nebã ra maana a Naball neere. B sõngame n ges a piisã yell tɩ wagda pa zu-⁠b ye. Daar a yembre, a Davɩɩd tʋma a nebã tɩ b tɩ kos a Naball bũmbu. A Davɩɩd nebã tɩ mikame t’a Naball ne a tʋm-​tʋmdbã da wõrsd piisã kõbdo. A Naball ra tara rɩ-​nood wʋsg baraarã, bala ra yaa kibs daare. A Davɩɩd nebã yeela a Naball yaa: ‘Tõnd maana foo neere. Tõnd pa zuk f pesg baa a yen ye, la d sõngame n ges b yelle. D bõos tɩ f bao rɩɩb n kõ-do.’

A Naball yeelame yaa: ‘Mam ka na n dɩk m dɩɩb n kõ nin-​yaals wa yãmb ye.’ A Naball goma a Davɩɩd nebã gom-​põaasa, n tʋ a Davɩɩde. Rapã sẽn lebg n tɩ togs a Davɩɩdã, a Davɩɩd sũurã puugame t’a yeel a nebã tɩ b bob sʋʋs tɩ b tɩ kʋ a Naball ne a nebã.

A Naball tʋm-​tʋmd a ye n wʋm a Naball sẽn da gomd a Davɩɩd nebã to-⁠to wã, n tɩ togs a Abigayille. Tao-​tao bala, a Abigayill baoa rɩɩb n zɩlg bõens n dɩk sorã n debd a Davɩɩd nengẽ. A sẽn wa n seg a Davɩɩd sorã zugã, a siga a bõangã zug n yĩgimd a Davɩɩd taoor n yeel yaa: ‘Maan-⁠y sugr la y ra ges mam sɩd a Naball sẽn maan bũmb ningã ye. A yaa yalma, la a tʋmda yalem-​tʋʋma. Maan-⁠y sugr la y reeg bũmb nins mam sẽn zã n na n wa kõ yãmbã, la y kõ tõnd sugr d kongrã yĩnga.’

A Davɩɩd yeela a Abigayill yaa: ‘Fo yaa pag sẽn tar yam. Fo gɩdga maam tɩ m pa kʋ a Naball a wẽnemã yĩng ye. Wẽnd na kuls-⁠f laafɩ.’ A Naball wa n kiime, t’a Davɩɩd rɩk a Abigayill n maan a paga.