Tanojnots 60

Abigail uan David

¿TIKIXMATI nejin ichpoch kuakualtsin tein kiitaki David? Motokaytia Abigail. Yej kimati kuali tanemilis, uan kitsakuiltij David maj amo kichiuani teisa tein amo kuali. Achto tikitatij toni kipanotoya David, uan satepan tikitaskej toni kichiuak Abigail.

Satepan keman David kicholuij Saúl, motatito itech se tepekoyok. Ikniuan uan okseki ichankauan kiajsitoj. No kiajsitoj kemej 400 takamej, uan David mochiuak imin tayekankauj. David kiitato tein tekiuajtia Moab uan kiiluij: ‘Xikinkaua ika kualtakayot maj mokauakan nikan nopopaj uan nomomaj, uan maj nikita toni nechpanoti’. Satepan, David uan itekitikauan motatijtinemiaj itech tepemej.

Satepan, David kiixmatik Abigail, se siuat tel kuakualtsin. Inamik, Nabal, katka se takat tein kitelpiaya miak tomin uan uejueyi talmej. Kipiaya 3,000 ichkamej uan 1,000 cabras. Nabal katka tel amo yolkuali. Sayoj ika inamik, kimatia kichiuas tein kuali. Uan se tonal kinimakixtij ichankauan. Maj tikitakan keniuj.

David uan itekitikauan kinextiliayaj kualtakayot Nabal. Kipaleuiayaj kinitaskej iichkauan. Se tonal David kintitanik seki itekitikauan maj kiontajtanianij se kualtakayot Nabal. Keman ajsikej, Nabal uan itekitikauan kinkixtilijtoyaj imin tojmiyo ichkamej. Kipiayaj se iluit, uan Nabal kipiaya miak takual. Yejika itekitikauan David kiiluijkej: ‘Tejuan timitsnextilijkej kualtakayot. Amo timitsichtekilijkej niose ichkat, uan timitspaleuijkej tikinitaskej. Axkan ika kualtakayot, xitechmaka tepitsin takual’.

Nabal tanankilij: ‘Amo nikinimakas takual takamej kemej namejuan’. Kintauelnankilij uan kijtouilij David miak taman tein amo kuali. Keman takamej kiiluijkej David, yej tel kualanik. Kiniluij: ‘¡Xikuikan namoespadas!’ Ompa kiskej uan yaya kinimiktitij Nabal uan itekitikauan.

Keman semej itekitikauan Nabal kikakik keniuj tatauelnankilij Nabal, kiiluij Abigail tein mochiuak. Abigail niman kisentilij takual, kinimamaltij seki asnos uan kisak kinamikito David. Keman iuan moajsik, temok itech iasno, moixpiloj uan kiiluij: ‘Tejuatsin, ika kualtakayot amo xikakili tein kijtoj nonamik Nabal. Yej amo tamati, uan tel amo kuali tein kichiua. Nimitsmaka nejin netetayokolil, xikseli ika kualtakayot, uan xitechtapojpolui tein mochiuak’.

David kinankilij: ‘Titeltamatkej. Tinechtsakuiltij maj amo nikmiktiti Nabal ika nochi tein tel amo kuali kichiua. Ximokepa mochan uan amo teyi ximoluiok’. Satepan, keman Nabal momikilij, Abigail mochiuako semej inamikuan David.

1 Samuel 22:1-4; 25:1-43.