Abigail niman David
Historia 60
Abigail niman David
¿TIKIXMATI yejon ichpochtli kualtsin akin uajnonisiuitiuj itech David? Itoka Abigail. Yejua melak kuajli tlanemilia, niman kiteltia David maka makichiua tlen xkuajli. Kachtopa matikitakan tlenon ipan nochiuaya David.
Ijkuak David choloua itech Saúl, oniyanato kampa se teostotl. Ikniuan niman ichanejkauan uajlauej kampa nemi. Kanaj 400 tlakamej uajlauej itech, niman David nochiua intlayekankauj. Kuakon David yauj kampa nemi akin tekiuajti ipan Moab, niman kijlia: ‘Nimitstlajtlanilia xkauili nikan manokauakan notaj niman nonan, hasta kampa manikita tlenon nopan nochiua’. Kuakon, David iuan isoldados peuaj niyantinemij ipan tepemej.
Sakin, David kixmati Abigail. Iueuentsin Abigail akin itoka Nabal, kipiya miyek tomin niman miyek tlaltin. Kipiya yeyi mil borregos niman mil chivos. Nabal xkuajli iyojlo. Abigail yejua se kualtsin siuatl akin kimatstika kenon kichiuas tlen kuajli. Se tonajli okinmakixti ichanejkauan. Matikitakan kenon opanok.
David niman isoldados yokichiuilijkej tlen kuajli Nabal. Yokipaleuijkej kintlajpiyaj iborregos. Se tonajli David kintitlani isoldados itlaj makijtlatlanilitij Nabal. Yejuamej ajsij kampa nemi Nabal, ijkuak yejua iuan itlapaleuijkauan kinxintoyaj iborregos. Ipan yejon tonajli onka iluitl, niman Nabal kipiya miyek tlakuajli uelik. Kuakon isoldados David kijliaj: ‘Melak miyek tlen kuajli yotikchiujkej motech. Yotimitspaleuijkej tikintlajpiyaj moborregos niman nion se xtikichtekij. Aman timitstlajtlaniliaj xtechmaka seki tlakuajli’.
‘Xnikinmakas tlakuajli tlakamej ken nemejuamej’, kijtoua Nabal. Tlaueltlajtoua niman peua kitejteneua David. Ijkuak isoldados David kijliaj yejuin, yejua melak kualani. Kimijlia: ‘¡Xkontilanakan nemoespadas!’ Niman yauej konmiktiskej Nabal iuan itlapaleuijkauan.
Se itlakeual Nabal, ijkuak okikak kenon otlaueltlajto, okijli Abigail tlenon opanok. Nimantsin Abigail kiyektlalia tlakuajli, kintlamamaltia ipolokouan, niman yauj. Ijkuak nonamiki iuan David, uajtemoua, notlakuanketsa niman kijlia: ‘Nimitstlajtlanilia tlakatsintli, maka xkaki tlen yokijto noueuentsin Nabal. Xkipiya itlamachilis niman kijtoua miyek tlen xkuajli. Nikan nimitsuajkuilia se tetlayokolijli. Nimitstlajtlanilia xseli niman xkilkaua tlen yopanok’.
‘Melak titlamachilise’, kinankilia David. ‘Yotinechtelti maka manikmikti Nabal maski xkuajli tlen yonexchiuili. Maka sa xmajmana, xuiya mochan.’ Sakin, ijkuak Nabal miki, David nonamiktia iuan Abigail.
