BO KONOSÉ e dama bunita ku ta bini pa kontra ku David? Su nòmber ta Abigail. E ta un hende ku ta usa su sintí bon, i el a kita David di hasi algu malu. Pero, promé ku nos siña tokante esei, ban mira kiko a sosodé ku David.

Despues ku David a hui pa Saul, el a skonde den kueba. Su rumannan i su sobrá famianan a bini serka dje einan. Rònt di 400 hòmber en total a bini serka dje, i David a bira nan hefe. Anto David a bai serka e rei di Moab i a pidié: ‘Por fabor, laga mi tata i mama keda serka bo te ora mi mira kiko lo sosodé ku mi.’ Despues, David i su trupa a bai skonde den seru.

Despues di esei David a topa ku Abigail. Su esposo Nabal tabata un kunukero riku. E tabatin 3.000 karné i 1.000 kabritu. Nabal tabata un mal hende. Pero su esposa Abigail tabata masha bunita. Tambe, e tabata sa di hasi loke ta bon. Un biaha asta el a salba su famia. Laga nos mira kon el a hasié.

David i su trupa a trata Nabal ku bondat. Nan a yuda protehá su karnénan. P’esei, un dia David a manda algun di su hòmbernan pa pidi Nabal un fabor. E hòmbernan di David a yega serka Nabal ora e trahadónan tabata pela karné. Tabata un dia di fiesta, i Nabal tabatin hopi bon kos pa kome. Pues, esaki ta loke e hòmbernan di David a bisa: ‘Nos a trata bo ku bondat. Nos no a hòrta ningun karné di bo, sino a yuda bo kuida nan. Awor, sea asina bon di duna nos kuminda.’

‘Mi no ta duna mi kuminda na hende manera boso,’ Nabal a bisa. El a papia malu ku nan, i a bisa kos malu tokante David. Ora ku e hòmbernan a bolbe i a bisa David di esei, David a bira mashá rabiá. El a bisa su trupa: ‘Bisti boso spada!’ I nan a sali pa bai mata Nabal i su hòmbernan.

Un di e hòmbernan di Nabal ku a tende e mal kosnan ku Nabal a papia, a bisa Abigail kiko a sosodé. Abigail a prepará kuminda umbes. El a pon’é riba algun buriku i a sali. Ora el a topa ku David, el a baha for di su buriku, a bùig i a bisa: ‘Por fabor, señor, no hasi kaso di mi kasá Nabal. E ta un bobo i ta hasi kos di bobo. Ata un regalo aki. Asept’é, por fabor, i pordoná nos pa loke a sosodé.’

David a kontestá: ‘Bo ta un hende sabí. Bo a kita mi di mata Nabal komo pago pa su maldat. Bai kas awor na pas.’ Despues di morto di Nabal, Abigail a bira un di e esposanan di David.

1 Samuel 22:1-4; 25:1-43.