60 yachachiy

Abigailwan Davidwan

DAVIDWAN tinkuq kʼacha warmita ¿riqsinkichu? Abigaíl sutikun. Payqa allin yuyayniyuq, mana David juchallikunanpaq yanaparqa. Manaraq kaymanta parlachkaspa, David ruwasqanta qhawarina.

David Saulmanta ayqispa, qaqa juskʼupi pakakurqa. Wawqisnin, ayllun ima payman jamurqanku. Yaqha 400 runa paywan karqanku, Davidtaq paykunata umacharqa. Chanta David Moabmanta reyninman rispa nirqa: ‘Tataypis, mamaypis qamkunawan qhipakunankuta mañarikuyki, imachus ñuqanmata kanqa chayta yachanaykama’, nispa. Chaymanta, David soldadosninwan, urqukunapi pakakurqanku.

Chaymanta David Abigailta riqsirqa. Abigailpa qusan Nabal karqa, chay runaqa qhapaq karqa, achkha jallpʼasniyuq, 3.000 ovejasniyuq, 1.000 cabrasniyuq ima kaspapis, may saqra runa karqa. Abigailqa kʼachita karqa, allin kaqtataq ruwaq. Juk kutiqa aylluntapis mana wañunanpaq yanaparqa. Qhawarina imaynatachus.

David soldadosninwan Nabalta yanaparqanku. Ovejasninta jarkʼapuq kanku. Juk pʼunchay Davidqa, soldadosnin Nabalmanta yanapata mañakuq kacharqa. Nabalwan kamachisninwan oveja ruthunapi kachkarqanku. Chaypiqa raymi pʼunchayta ruwachkarqanku, may chhika mikhuna karqa. Chayrayku Davidpa kamachisnin ninku: ‘Qamta yanaparqayku. Mana ima ovejaykitapis suwaykuchu, manaqa jarkʼaysiyku. Kunanqa, ima mikhunatapis quriwayku’, nispa.

‘Qamkunajina runasman mana ima mikhunatapis qusaqchu’, nispa Nabal kutichirqa. Millayta parlan, Davidmantapis mana allintachu parlan. Davidman chayta willaptinku payqa mayta phiñakurqa. ‘¡Espadasniykichikta uqharikuychik! Nabalta aylluntawan wañuchimusunchik’, nispa rirqanku.

Nabalpa kamachin pay millayta parlasqanta uyarispa, Abigailman willaykun. Abigailqa mikhunata wakichikuytawan, burruman lluqʼaykuspa Davidta taripaq lluqsirqa. Davidwan tinkuspa, burrumanta uraykun, kʼumuykukuspataq nirqa: ‘Wiraquchiy, ama Nabal qusaytaqa kasuychu. Payqa wampu runapuni imatapis ruwallan. Kay tʼinkata apanpuyki. Japʼikullay, ruwasqaykutataq perdonawayku’, nispa.

‘Qamqa allin yuyayniyuq kanki’, nispa David kutichirqa. ‘Manachus qam usqhayta jamuwaq karqa chayqa, Nabalta saqra kasqanrayku wañuychiyman karqa. Kunanqa ama llakikuspa wasiykiman ripuy’, nispa kachapurqa. Chanta, Nabal wañupuqtin, Davidqa Abigailwan casarakurqa.

1 Samuel 22:1-4; 25:1-43.