¿LA AWETAʼM uwäch wajun jeʼlikalaj ixoq che xpe che rilik David? Abigail ubʼiʼ. Wajun ixoq kʼo unojibʼäl, xuya ta che ri David xubʼan jun itzelal. Nabʼe chuwäch wariʼ, chqilaʼ su tijan kubʼan David.

Chiʼ David xanmaj chuwäch Saúl, xukʼuʼ (xurwaj) ribʼ pa jun jul. Ri ufamilia xepe rukʼ. Xepe 400 achijabʼ rukʼ, David xubʼan ajkʼamal bʼe pa kiwiʼ. David xbʼe rukʼ ri ajawinel rech Moab, xubʼij wariʼ che: ‹Chabʼana jun toqʼobʼ, chekanaj kan ri nutat nunan awukʼ, in kinwil na su kinriqo›. Tekʼuriʼ David xuqujeʼ ri täq achijabʼ xkekʼuʼ kibʼ pa täq ri qʼayes (ʼiyes).

Qʼaxnäq chi ri junabʼ, David xretaʼmaj uwäch Abigail. Ri rachajil ri Abigail ubʼiʼ Nabal kʼo sibʼalaj pwäq rukʼ xuqujeʼ kʼo kʼi täq rulew. Kʼo 3.000 täq uchij xuqujeʼ 1.000 täq ukʼisikʼ. Nabal sibʼalaj itzel achi. Tekʼuriʼ ri rixoqil, jun utzalaj ixoq xuqujeʼ sibʼalaj utz kkaʼyik. Kʼo jun qʼij che xukʼol ri ufamilia che ri kʼäx. Chqilaʼ su ubʼanik wariʼ.

David rukʼ ri täq achijabʼ kkebʼanom ri utz che Nabal. Ketoʼm che uchajexik ri täq uchij. Xopan jun qʼij che ri David xeʼutaq bʼi ri achijabʼ che utaʼik jun toqʼobʼ che Nabal. Wa täq achijabʼ xeʼopan rukʼ Nabal chiʼ areʼ, o re, xuqujeʼ ri ajupatinel tijan kkequpij kismal ri täq chij xuqujeʼ e kʼo pa nimqʼij, e kʼo kʼi utzalaj täq ktijowik pa rachoch. Rumal laʼ ri täq upatanel David xkebʼij wariʼ: ‹Xqabʼan ri utz chawe. Kʼot jun chij qelqʼam chawe, xa e qachajim. Kimik chabʼana jun toqʼobʼ chaya jujun täq ktijowik chaqe›.

‹Kʼot jun ktijowik kinya chike ri achijabʼ junam iwukʼ ix›, xchaʼ Nabal. Xchʼaw rukʼ itzelal, xuqujeʼ xubʼij itzel täq tzij chirij David. Chiʼ wa täq achijabʼ xkebʼij wariʼ che David, sibʼalaj xpe royowal, o riwal. ‹¡Chikʼama bʼi ri täq chʼichʼ!› Xchaʼ chike. Xebʼe che ukamsaxik ri Nabal rukʼ ri täq achijabʼ.

Jun chike ri upatinel ri Nabal, xuta ri itzel täq tzij xubʼij Nabal, xubʼij che Abigail ri xbʼantajik. Ri Abigail xubʼan bʼi kʼi täq ktijowik, chanim xuya bʼi chikij ri täq bʼur tekʼuriʼ xbʼek. Chiʼ xopan rukʼ David, xqaj chirij ri ubʼur tekʼuriʼ rukʼ utzil xubʼij: ‹Chabʼana jun toqʼobʼ, tat, xaq mata ri xubʼij wachajil Nabal. Areʼ kʼot unoʼj rumal laʼ retaʼm täj su kubʼano. Xinkʼam lo jun sipanik chawe. Chakʼamaʼ chwe, tekʼuriʼ chasacha qamak rumal ri xbʼantajik›.

‹Sibʼalaj kʼo anojibʼäl›, xchaʼ David. ‹Xabʼano che kinkamsaj ta ri Nabal rech kutoj ri itzelal xubʼano. Chattzalij rukʼ utzil pa awachoch.› Tekʼuriʼ, chiʼ Nabal xkamik, Abigail xubʼan jun chike ri täq rixoqil ri David.