¿YACHANKICHU pitaq Davidman asuykuq chay buenamoza warmiqa? Abigailmi sutinqa. Payqa allinta piensaqmi karqa hinaspa Davidta mana allinta rurananta harkakurqa. Ichaqa Davidman manaraq richkaptin, imam pasasqanta qawasunchik.

Davidqa Saulmanta lluptispa ayqekuspanmi machaypi pakakurqa. Hinaptinmi wawqenkunapiwan llapallan ayllunkuna pasarqaku paywan huñunakunankupaq. Chaymantapas 400 runakuna Davidman rirqaku hinaptin payña jefenku karqa. Hinaspam Davidqa Moab nacionpi reyman rispan nirqa: ‘Ama hina kaspayá mama-taytay ripukamuspanyá qanwan kachun imam Diospa munasqanta yachanaykama’ nispa. Chaymantam Davidqa runankunapiwan monte lawkunapi pakakurqaku.

Chaymantañan Davidqa Abigailta reqsirurqa. Abigailpa qosan Nabal sutiyoq runañataq achkallaña chakrayoq llumpay apu runa kaptin, 3.000 ovejankuna hinaspa 1.000 cabrankunapas kapurqa. Nabalqa karqa pasaypaq rumi sonqo. Warmin Abigailmi ichaqa karqa buenamozallaña hinaspapas yachaywan imapas allin ruraq. Familiantapas huk kutipim wañunankumanta librarqa. Qawasunchik imaynatam chayta rurarqa.

Davidwan runankunaqa allinllam Nabalwanqa karqaku. Ovejankunata imamantapas harkaqku. Chaymi Davidqa runankunata Nabalman kacharqa. Hinaptinmi paykunaqa Nabalpa kasqanman chayarqaku runankunawan Nabalqa ovejankunata rutuchkaptin. Chay punchawkunaqa Nabalpa wasinpim fiesta karqa chaymi achkallaña mikunapaq allin kaqninkuna karqa. Chaymi Davidpa runankuna nirqaku: ‘Ñoqaykuqa qamkunawan allinllam karqaniku. Manam ovejaykikunapas chinkarqachu, aswanqa imamantapas harkarqaniku. Qoykullawaykuyá imallaykipas kapusuqnikita’ nispa.

Nabalñataqmi nirqa: ‘Manam qoymanchu ima mikuyniytapas mana reqsisqa yanqa purikuq runamanqa’ nispa. Nabalqa cheqnipakuspam Davidmanta imaymanata insultarqa. Davidman runankuna chaymanta willakuptinku Davidqa llumpayta piñakuruspa nirqa: ‘¡Espadaykichikta llapallaykichik watakuychik!’ nispa. Hinaspanmi Nabalta chaynataq llapachallan qari kaq ayllunkunata wañurachinankupaq rirqaku.

Nabalpa llapa ima mana allinkunata rimasqanta uyarispanmi huknin sirvienten pasarqa patronan Abigailman willaq. Abigailñataqmi apurawllataña mikuykunata alistarqa hinaspa asnonkunapi cargakuykuspanmi pasarqa. Hinaptinmi Davidta taripaykuspa asnonmanta apurawman uraykurqa hinaspa qonqoranpa pampaman kumuykuspa nirqa: ‘Amayá kasuychu taytáy, chay torpe runa Nabal qosaytaqa. Arí, payqa mana umayoq upa runam. Kayqaya regalokuna apamusqayqa. Chaskiykuwaspaykikuyá pampachaykuwaykupas’ nispa.

Davidñataqmi nirqa: ‘Allin piensaqmá kasqanki. Kunanmi harkaykuwanki Nabalta vengakuspa wañuchinaytaqa. Kunanqa hawkallañayá kutikuy wasikiman’ nispa. Chaymantañam Nabal wañuruptin, Abigailqa Davidpa warminpas karqa.