DAAWITIWA higge dagganni nooti xuma mancho ayiitiro afootto? Suˈmise Abigayeeliiti. Ise egennaamete; qolteno Daawiti bushare assannota hooltino. Tenne hajore ronsammora albaanni, Daawitira marichchi iillinosiro hanni laˈno.

Daawiti Saaooliwiinni xooqihu gedensaanni, godaho maaxami. Roduuwisinna wolootu maatesi hakko marte ledosi heedhu. Isiwa marino manni 400 meddi yaanno; isino hakko mannira massagaancho ikki. Hakkiinnino Daawiti Moaabi gobba nugusiwa mare, ‘Ikkeemmota afammo geeshsha, ballo anniˈyanna amaˈya atewa heedhona’ yii. Gedensaannino Daawitinna mannisi tulluwate maaxantanni keeshshitu.

Daawiti Abigayeelinni xaadinohu hakkunni gedensaanniiti. Abigayeeli gashshaanni Naabaali lowo baatto afiˈrino dureessaati. Isira 3,000 gereewinna 1,000 mei noosi. Naabaali busha manchooti. Galtesi Abigayeeli kayinni xumate; qolteno, danchare assitannote. Mitte yannara isinni maatese gatissino. Hiitto assite gatissinoro hanni laˈno.

Daawitinna mannisi Naabaalira danchare assitino. Gereewisi gawajjamannokki gede agartino. Konni daafira Daawiti mitto barra Naabaali mitore aasira manna soyi. Daawiti soyino manni, Naabaalinna mannisi gereewisira orda hooltanna martu. Naabaali hakko barra jila qixxeesse no; minesi intanniri woˈme no. Konni daafira Daawiti mannooti, ‘Ninke atera danchare assinoommohe. Gereewikki giddonni mittono dimoorroommo; roorenkanni gereewokki agarroommo. Xa kayinni shiima sagale uyinke’ yitu.

Naabaalino, ‘Kiˈne gedee mannira sagaleˈya dieemmo’ yee qoli. Isino busha qaale coyiˈri; Daawiti aanano bushare coyiˈri. Mannootu Daawitiwa dagge tenne kultusita, isino lowo geeshsha hanqi. Mannasino, ‘Biseˈne qodhe!’ yii. Insano Naabaalinna mannasi shitara hadhu.

Naabaali busha qaale coyiˈranna macciishshinohu mittu isi soqqamaanchi, ikkinore Abigayeelira kulise. Hakkawotenni Abigayeeli sagale qixxeessitu. Sagaleno harrete hogobbe hadhu. Daawitinni xaadduti harrichchisenni dirrite, guluphphite togo yitusi: ‘Mootichchaˈya ballo, ayiddaanniˈya Naabaalire mishshe aguri. Isi gowwaho; gowwa coyella assanno. Konne abboommahere adhi ballo; eeggatena maarinke.’

Daawitino, ‘Ati egennaamete. Naabaali bunshesira shee rabbisireemmota gatisoottae. Keerunni minikkira haˈri’ yiise. Gedensaanni Naabaali reyita, Abigayeeli Daawiti galte ikkitino.