Tantara 60

Abigaila Noho Davida

HAINAO va hoe, ia ampela soa mamonjy an’i Davida io? Abigaila ty anarane. Hendry ampela io. Nosakànane Davida tsy hanao raha raty. Fe aloha’ty hianarantsika mikasike raha zay, le ndao ho henteantsika tseky ty raha nahazo an’i Davida.

Laha fa nilay an’i Saoly Davida, le nivòny tanaty lava-bato zay tao. Namonjy aze tao ty rahalahine noho ty fianakaviane. Nisy lahilahy 400 teo ho eo niavy tamine teo, ka nanjary sefon-droze Davida. Nandeha tamy mpanjakan’i Moaba tany Davida, ka nivòla tamine hoe: ‘Mba mangatake aminao lahy aho, engào hipetrake aminao eto ty babako amin-dreniko, zisiky hahaìzako ty raha hiseho amiko.’ Nanomboke nivòny tamy vohitse kelikele tany Davida noho olo tarihine reny, laha fa tafara atoy.

Tafara raha zay le nifankahita tamin’i Abigaila Davida. Lahilahy mpanarivo bibike valin’i Abigaila io. Nabala ty anarane. Nana tany maro ie, noho aondry 3 000, voho aosy 1 000. Lahilahy raty fanahy sady matìty, Nabala, fa tsy nanahake an’i Abigaila valine, ampela soa sady tea nanao raha mahity. Nanavotse ty fianakaviane iaby aza ie ndraike andro. Ndao ho henteantsika ty fomba nanaòvane raha zay.

Nisoa fanahy tamin’i Nabala, Davida noho lahilahy namane reo. Niaro ty aondrin’i Nabala roze. Ka ndraike andro Davida, le nanirake namane reo, mba hangatake raha tamin’i Nabala tany. Niavy tany naman’i Davida reny tamy fotoa nanapahan’i Nabala noho mpiasane reo ty volon’aondrine. Andro fety tami’zay, nana hany soa maro bibike azo nihàny Nabala. Ka, hoy ty asa naman’i Davida nirahine reny hoe: ‘Nisoa fanahy taminao zahay. Tsy nangalatse ndre raike tamy aondrinao reo zahay, fa nikarakara aze soa. Ka mba ameo hany lahy zahay.’

Fe hoy ty asan’i Nabala hoe: ‘Tsy hanome ty haniko, ho an’olo manahake anareo mihitsy aho.’ Nasiake biby ie laha fa nivòla, no sady nanaraty an’i Davida. Ka laha fa nimpòly tamin’i Davida tany namane reny, le nitantara tamine ty safàn’i Nabala. Neloke biby Davida laha fa naharé raha zay. ‘Andeso iaby ty sabatsinareo!’ hoy ty asane tamy lahilahy namane reo. Nandeha roze mba hamono an’i Nabala noho ty namane.

Nitantara tamin’i Abigaila ty raha niseho, ty raike tamy lahilahy naman’i Nabala naharé safà raty nataon’i Nabala io. Avy le nikarakara hany maromaro Abigaila laha fa naharé raha zay. Naondrane tamy boriky maromaro raha reo, ka nandeha ie. Laha vo nahita an’i Davida ie, le nijòtso tamy borikiny iny teo, niankohoke tamy tany ie sady nivòla tamin’i Davida hoe: ‘Mba mangatake aminao aho lahy, ka daréa raha novolànin’i Nabala, valiko reny. Gege ie ka tsy eritseretine iaby ty raha ataone. Ndreto misy raha ameako anareo. Mba rambeso lahy raha retoa, le ka mitanjake lolom-po aminay sasy iha.’

‘Ampela hendry iha’, hoy ty asan’i Davida. ‘Nitanjake ahy tsy hamono an’i Nabala noho hamaly faty tamy haratiam-panahine iha. Ndahàna lahy iha, moly an-tranonao ane.’ Laha fa nimaty Nabala tafara atoy, le nanjary raike tamy valin’i Davida reny Abigaila.

1 Samoela 22:1-4; 25:1-43.